কলিয়াবৰ,২০ জুন: আজি বিষ্ণু ৰাভা দিৱস । জীৱন কালতে কিংবদন্তিত পৰিণত হোৱা ‘একমেব দ্বিতীয়ম’ এইগৰাকী বিপ্লৱী চেতনাস্ৰোতৰ চিৰন্তন বাৰ্তাবাহকক এই দিনটোতে ৰজা-প্ৰজা সকলোৱে সুঁৱৰিছে । বিষ্ণুপ্ৰসাদ ৰাভা, কুৰি শতিকাৰ কেইবাটাও দশক জুৰি অসমৰ চিন্তা-জগতখনত তোলপাৰ লগোৱা মানুহজন নিজেই এক অনুষ্ঠান । গীত, কবিতা, চিত্ৰশিল্প, নৃত্য, সংগীত, অভিনয় আৰু ব্যাপক পৰিমাণৰ গৱেষণালব্ধ লেখা-মেলাই ৰাভাদেউক এক অনন্য ৰূপ প্ৰদান কৰিছে । লগতে সোণতে সুৱগা চৰাইছে ৰাভাদেউৰ অনবদ্য সংগ্ৰামী জীৱন আৰু ৰাজনীতিয়ে । এইজনা মহান অসমীয়াক কলিয়াবৰৰ তিনিটা প্ৰজন্মই সোঁৱৰিছে তেখেতৰ গীতেৰে, তেখেতৰ চিন্তাৰে ।
বিষ্ণুপ্ৰসাদ ৰাভাৰ মৃত্যু দিৱসত দিশা মুখাৰ্জী আৰু স্নেহা ৰয়ে স্মৰণ কৰিলে দুটি গীতৰ কলিৰে আৰু তবলা সঙ্গত কৰিলে পঞ্চম ভৌমিকে । অসমীয়া চিৰ যুগমীয়া গীতৰ চৰ্চাৰ লগত জড়িত শিক্ষক নয়নজ্যোতি শইকীয়াই ক'লে মনৰ কথা, সমৃদ্ধিশালী অসম গঢ়াৰ কথা । কলিয়াবৰৰ বিশিষ্ট সঙ্গীত শিল্পী, প্ৰশিক্ষক তথা ভ্ৰাম্যমান থিয়েটাৰৰ এসময়ৰ জনপ্ৰিয় গায়ক-সুৰকাৰ যোগেন বৰদলৈয়ে নৱ-প্ৰজন্মক জনালে বিষ্ণু ৰাভা সঙ্গীত চৰ্চাৰ কৰিবলৈ আহ্বান ।
কলিয়াবৰত অসম সাহিত্য সভাৰ কলিয়াবৰ জিলা শাখা, অসম লেখিকা সমাৰোহৰ কলিয়াবৰ জিলা শাখা আৰু কলিয়াবৰ কেন্দ্ৰীয় ছাত্ৰ সন্থাৰ যুটীয়া উদ্যোগত দিনজোৰা কাৰ্য্যসূচীৰে ৰাভা দিৱসৰ আয়োজন ।
