কলিয়াবৰ,11 এপ্ৰিলঃ কলিয়াবৰত আৰক্ষীৰ জালত তিনি অসাধু ব্যৱসায়ী ৷ মহকুমাধিপতিৰ অনুমতি পত্ৰ জালিয়াতিৰে কলিয়াবৰৰ পৰা উজনি অসমৰ ভিন্ন স্থানলৈ লক ডাউনৰ সুযোগতে শাক-পাচলি সৰবৰাহ কৰিছিল ব্যৱসায়ী কেইজনে ৷ অৱশেষত কলিয়াবৰৰ মহকুমাধিপতি বিতোপন নেওগৰ এজাহাৰৰ ভিত্তিত শুকুৰবাৰৰ নিশা মজিবুৰ ৰহমান, খাইৰুল আলী আৰু মাণিক হুছেইন নামৰ ব্যৱসায়ী তিনিজনক গ্ৰেপ্তাৰ কৰে কলিয়াবৰ আৰক্ষীয়ে । ধৃত ব্যৱসায়ী কেইজনৰ ঘৰ কলিয়াবৰৰ বৰঘূলীত । আৰক্ষীয়ে ব্যৱসায়ী কেইজনে ব্যৱহাৰ কৰা তিনিখন বাহনো জব্দ কৰে ।
আনহাতে, লক ডাউন উলংঘা কৰি অনুমতি অবিহনে অবৈধভাৱে শাক-পাচলি সৰবৰাহ কৰা অন্য দুখন বাহন জব্দ কৰে কলিয়াবৰ আৰক্ষীয়ে । ব্যৱসায়ী কেইজনে বাহন দুখনেৰে দৰং জিলাৰ খাৰুপেটীয়াৰ পৰা উজনি অসমৰ ভিন্ন প্ৰান্তলৈ লক ডাউনৰ সুযোগতে শাক-পাচলি সৰবৰাহ কৰিছিল ৷
লগতে চাওকঃ চৰকাৰৰ বিৰুদ্ধে ৰাজপথত পাঁচগ্রাম কাছাৰ কাগজকলৰ কৰ্মী
