ৰহাত দুখীয়া পৰিয়ালৰ মাজত খাদ্য সামগ্ৰী বিতৰণ

লক্ ডাউনৰ সময়চোৱাত খাদ্য সংকটত ভুগিছে দৰিদ্ৰ শ্ৰেণীৰ একাংশ লোকে ৷ দিন ভিক্ষা প্ৰাণ ৰক্ষা কৰা লোকসকলৰ বাবে উপাৰ্জনৰ পথ বন্ধ হৈ পৰিছে লক্ ডাউনৰ ফলত ৷

ৰহা, 31 মাৰ্চ : দেশজুৰি হৈ থকা লক্ ডাউনৰ সময়ত শ্ৰমজীৱি দৰিদ্ৰ লোক সকলে সম্প্ৰতি দুবেলা দুমুঠি খাদ্যৰ বাবে হাহাকাৰ কৰিবলগীয়া অৱস্থাত পৰিছে ৷ এনে পৰিপ্ৰেক্ষিতত মঙলবাৰে ৰহা নগৰৰ বিভিন্ন ৱাৰ্ডত বসবাস কৰা প্ৰায় ২০০ টা দৰিদ্ৰ পৰিয়ালৰ মাজত খাদ্য সামগ্ৰী বিতৰণ কৰে ৰহা আঞ্চলিক ছাত্ৰ সন্থাই ৷ প্ৰশাসনে জাৰি কৰা নীতি নিৰ্দেশনা মতে শাৰীৰিক দুৰত্ব বজাই ৰাখি দৰিদ্ৰ পৰিয়াল সকলৰ ঘৰে ঘৰে গৈ চাউল,দাইল,নিমখ,পাচলি আদিৰ লগতে ভিন্ন অত্যাৱশ্যকীয় সামগ্ৰী বিতৰণ কৰে ছাত্ৰ সংগঠনটোৱে । তাৰোপৰি ৰহাত দৰিদ্ৰ লোকৰ বাবে ঔষধ যোগানৰ ব্যৱস্থা কৰা হৈছে বুলিও জানিবলৈ দিয়ে আছুৰ কৰ্মকতাই ৷

উল্লেখ্য যে, সমগ্ৰ বিশ্বতে কৰ'ণা ভাইৰাছে যি মহামাৰীৰ ৰূপ ধাৰণ কৰিছে তাৰ পৰিপ্ৰেক্ষিতত বিশ্ব জুৰি এক প্ৰকাৰৰ অচলাৱস্থাৰ সৃষ্টি হৈছে ৷ ভাৰততো প্ৰধানমন্ত্ৰী নৰেন্দ্ৰ মোডীয়ে 21 দিনৰ বাবে লক্ ডাউন ঘোষণা কৰিছিল ৷ কিন্তু এই লক্ ডাউনে দৰিদ্ৰ শ্ৰেণীৰ লোকসকলৰ বাবে সমস্যাৰ সৃষ্টি কৰিছে ৷ অসমৰ ভিন্ন ঠাইত দৰিদ্ৰ লোকসকলক সহায়ৰ হাত আগবঢ়াইছে ৷ যাৰ বাবে কিছু পৰিমাণে সকাহ লাভ কৰিছে এই লোকসকলে ৷

লগতে পঢ়ক : অসমত প্ৰথমগৰাকী কৰ'ণা আক্ৰান্ত ব্যক্তি চিনাক্ত : হিমন্ত বিশ্ব শৰ্মা