নগাঁও, ৭ ছেপ্টেম্বৰ: সেউজীয়া ধৰণীক সেউজীয়া কৰি ৰখাৰ প্ৰয়াস সদৌ অসম ছাত্ৰ সন্থাৰ । এইবাৰ পৰিৱেশ সংৰক্ষণৰ স্বাৰ্থত ৰাজপথলৈ ওলাই আহিল সদৌ অসম ছাত্ৰ সন্থাৰ নগাঁও জিলা সমিতি । নগাঁও চহৰৰ অপৰিস্কাৰ পৰিৱেশে অতিষ্ঠ কৰিছে সাধাৰণ ৰাইজৰ লগতে সংগঠনটোকো । সেয়ে, মঙলবাৰে প্লাষ্টিক মুক্ত নগাঁও গঢ়াৰ সংকল্পৰে মানৱ শৃংখল কাৰ্যসূচী ৰূপায়ণ কৰে আছুৰ নগাঁও জিলা সমিতিৰ কৰ্মকৰ্তাসকলে ।
উপায়ুক্তৰ কাৰ্যালয়ৰ সন্মুখত মানৱ শৃংখল কাৰ্যসূচী ৰূপায়ণ কৰি প্লাষ্টিক বৰ্জনৰ ক্ষেত্ৰত সজাগতা সৃষ্টিৰো প্ৰয়াস কৰে সংগঠনটোৱে । উল্লেখ্য যে, চৰকাৰ, প্ৰশাসনে প্লাষ্টিকৰ ব্যৱহাৰ নিষিদ্ধ কৰাৰ নিৰ্দেশ জাৰি কৰিছে যদিও নগাঁৱত এই নিৰ্দেশনা ভেকো ভাওনাত পৰিণত হৈছে । চৰকাৰ তথা প্ৰশাসনৰ এই নিৰ্দেশনা কাৰ্যকৰী নোহোৱাৰ বাবেই নগাঁও জিলাত প্লাষ্টিক ব্যৱহাৰ বন্ধ হোৱা নাই । সেয়ে, এই নিৰ্দেশনা কাৰ্যকৰী কৰাৰ দাবী জনাইছে সংগঠনটোৰ কৰ্মকৰ্তাসকলে ।
তেওঁলোকৰ মতে, প্লাষ্টিকৰ ব্যৱহাৰ সম্পূৰ্ণ বন্ধ কৰিব নোৱাৰিলেও ব্যৱহাৰ কমকৈ কৰিব পৰা যায় । অন্যথা নগাঁও চহৰখন অচিৰেই এখন লেতেৰা চহৰলৈ পৰিণত হ'ব ।
এই ক্ষেত্ৰত চৰকাৰক কঠোৰ পদক্ষেপ গ্ৰহণ কৰিবলৈ সংগঠনটোৱে আহ্বান জনাইছে । লগতে ৰাইজকো সজাগ হ'বলৈ আহ্বান জনায় নগাঁও জিলা ছাত্ৰ সন্থাই । লগতে নগাঁও পৌৰ সভা বিগত এটা বছৰে গঠন নকৰাৰ ফলতেই পৌৰ সভা এলেকাৰ ৰাইজে যথেষ্ট অসুবিধাৰ সন্মুখীন হৈছে বুলি মন্তব্য কৰি সংগঠনটোৰ নেতৃবৰ্গই শীঘ্ৰে পৌৰ সভা গঠনৰ দাবী জনায় ।
লগতে পঢ়ক:ৰঙাপাৰাত PMAY আঁচনিৰ নামত ব্যাপক লুণ্ঠন
