হোজাই, 7 ছেপ্তেম্বৰ : লক ডাউনৰ বাবে আৰ্থিকভাৱে জুৰুলা হৈ পৰিছে বহু লোক । বহুলোকে আকৌ কৰ্ম-সংস্থাপন হেৰুওৱাৰ ফলত জীৱিকাৰ বাবে হাহাকাৰ কৰিবলগীয়া হৈছে । এই সংকটৰ সময়ত সকলোৰে বাবে নিদৰ্শন হৈ পৰিছে হোজাই জিলাৰ ডবকাৰ সাংবাদিক আব্দুল হান্নান তালুকদাৰ ৷
আব্দুল হান্নান তালুকদাৰে লক ডাউনৰ সময়তে ব্যক্তিগত প্ৰচেষ্টাৰে এখন হাঁহৰ লগতে হাঁহ পোৱালি উৎপাদন কৰিব পৰা ফাৰ্ম সাজি উলিয়ায় । প্ৰথমে অতি কম পুঁজিৰে আৰম্ভ কৰা হাঁহৰ ফাৰ্মখনত বৰ্তমান তিনিশৰো অধিক হাঁহ থকাৰ উপৰিও প্ৰায় দুশ হাঁহৰ কণী জমা হৈ আছে । ইয়াৰ উপৰিও তালুকদাৰে ফাৰ্মখনৰ কৰ্মত নিয়োজিত কৰিছে চাৰিজনকৈ লোক ।
তালুকদাৰে সম্প্ৰতি সাংবাদিকতাৰ লগতে প্ৰত্যেক দিনাই সমানে সময় দিয়ে ফাৰ্মখনত । বৰ্তমান ফাৰ্মখনৰ দ্বাৰাই পৰিয়ালটোৰ লগতে আন দুটাকৈ পৰিয়ালৰ কৰ্ম-সংস্থাপনৰ সুবিধা কৰি সুন্দৰকৈ পৰিয়াল পোহপাল দিছে সাংবাদিকগৰাকীয়ে । আব্দুল হান্নান তালুকদাৰে শিক্ষিত নিবনুৱা যুৱক-যুৱতীক এনেধৰণে কৰ্ম সংস্থাপনৰ বাট মুকলি কৰিবলৈ আহ্বান জনায় ৷ যাতে নিবনুৱা যুৱক-যুৱতীসকলে কর্ম সংস্থাপনৰ অভাৱত ভুগিবলগীয়া নহয় ।
লগতে পঢ়ক : বঙ্গাল-বঙ্গালনী গ্ৰস্থ বিতৰ্ক : স্থিতি স্পষ্ট কৰিলে অধ্যাপক ড৹ প্ৰফুল্ল কুমাৰ নাথে
