কলিয়াবৰ,18 ডিচেম্বৰ: আজি চিন্তানায়ক যতীন্দ্ৰ কুমাৰ বৰগোহাঞিৰ ৭ম বাৰ্ষিক স্মৃতি দিৱস ৷ অসমৰ এগৰাকী সাংবাদিক, সাহিত্যিক, অৰ্থনীতিবিদ, বুদ্ধিজীৱী আৰু সমাজকৰ্মী, অসমৰ এগৰাকী আগশাৰীৰ চিন্তাবিদ ৰূপে প্ৰতিষ্ঠা লাভ কৰা যতীন্দ্ৰ কুমাৰ বৰগোহাঞি ১৯৫০ চনৰ ৮ চেপ্তেম্বৰত বৰ্তমানৰ কলিয়াবৰ মহকুমাৰ জখলাবন্ধাত জন্ম গ্ৰহণ কৰিছিল । তেখেতে অসমীয়া সাহিত্য জগতলৈ আগবঢ়াই থৈ যোৱা সৃষ্টি আৰু কৰ্মৰাজি অতুলনীয় ৷ যতীন্দ্ৰ কুমাৰ বৰগোহাঞিয়ে তেওঁৰ জীৱন কালত বিভিন্ন বিষয়ৰ ৪৫ খনতকৈও অধিক গ্ৰন্থ ৰচনা কৰাৰ লগতে ১৫০ তকৈও অধিক গল্প ৰচনা কৰিছিল ৷ ১৯৮৯ চনত তেখেতৰ অসমৰ সাংস্কৃতিক ইতিহাস নামৰ গ্ৰন্থখনৰ বাবে দধি মহন্ত সোৱঁৰণি ন্যাসে বিষ্ণু ৰাভা বঁটা প্ৰদান কৰিছিল ৷ তেখেতে ৰচনা কৰা বহু কেইখন গ্ৰন্থই ইতিমধ্যে কেইবাটাও ভাৰতীয় ভাষালৈ অনুদিত হৈছে ৷
উল্লেখ্য যে, ২০১৩ চনৰ ১৮ ডিচেম্বৰ তাৰিখে গুৱাহাটীত শেষ নিশ্বাস ত্যাগ কৰা চিন্তানায়ক গৰাকীৰ ৭ম বাৰ্ষিক স্মৃতি দিৱস উদযাপন কৰা হয় কলিয়াবৰত ৷ স্মৃতি দিৱসৰ লগত সংগতি ৰাখি প্ৰয়াত বৰগোহাঞিৰ সমাধিস্থলত নিৰ্মাণ কৰা আৱক্ষ মূৰ্ত্তি, স্মৃতি উদ্যান আৰু প্ৰেক্ষাগৃহ আজি আনুষ্ঠানিকভাবে উন্মোচন কৰে অসম চৰকাৰৰ মন্ত্ৰী কেশৱ মহন্তই ৷ উন্মোচনী অনুষ্ঠানত প্ৰাক্তন মন্ত্ৰী গুণীন হাজৰিকা তথা কলিয়াবৰৰ বিশিষ্ট ব্যক্তি তথা বিভিন্ন অনুষ্ঠানৰ বিষয়-ববীয়া উপস্থিত থাকে ৷
লগতে পঢ়ক: ৩০০ উদ্যোগীক ৪৫,০০০ টকা মূল্যৰ সঁজুলি বিতৰণ
