পবিতৰাত মুখ্যমন্ত্ৰী সৰ্বানন্দ সোণোৱাল

পবিতৰাত ৰাজ্যিক বন্যপ্ৰাণী সপ্তাহ উদযাপন : উপস্থিত মুখ্যমন্ত্ৰী সৰ্বানন্দ সোণোৱাল

মৰিগাঁও,2 অক্টোৱৰ : অসম জৈৱ বৈচিত্ৰৰে ভৰপুৰ এখন শক্তিশালী ৰাজ্য । প্ৰাকৃতিক পৰিৱেশে পৰিপূৰ্ণ ৰাজ্যখন আৰু অধিক শক্তিশালী ৰূপত গঢ় দিয়াৰ বাবে আমি সকলো আগবাঢ়ি আহিব লাগিব । অসমৰ পাহাৰ ভৈয়ামত থকা সকলো বনজ সম্পদ , বন্যপ্ৰাণী আদি সংৰক্ষণতো অধিক গুৰুত্ব দিব লাগিব অসমৰ জনগণে । এই মন্তব্য ৰাজ্যৰ মুখ্যমন্ত্ৰী সৰ্বানন্দ সোণোৱালৰ । মৰিগাঁও জিলাৰ পশ্চিম প্ৰান্ত পবিতৰাৰ সমীপৰ বুঢ়ামায়ঙত বুধবাৰে অনুষ্ঠিত ৬৫ সংখ্যক বন্যপ্ৰাণী সপ্তাহ উদযাপনৰ কাৰ্যসূচীত মুখ্য অতিথি হিচাপে অংশগ্ৰহণ কৰে মুখ্যমন্ত্ৰী সোণোৱালে ৷ অনুষ্ঠানত জাতিৰ পিতা মহাত্মা গান্ধীৰ ডেৰশ বছৰীয়া জন্ম জয়ন্তীৰ লগত সংগতি ৰাখি সমগ্ৰ দেশতে অব্যাহত থকা স্বচ্ছ ভাৰত অভিযানত সকলো স্তৰৰ লোকক চামিল হ'বলৈ আহ্বান জনাই মুখ্যমন্ত্ৰী গৰাকীয়ে ৷ লগতে মুখ্যমন্ত্ৰীগৰাকীয়ে অসমখন প্লাষ্টিক মুক্ত ৰাজ্য হিচাপে গঢ়ি তুলাৰ আহ্বান জনাই ৰাজ্যৰ প্ৰতিজন নাগৰিককে ।

পৰিৱেশ আৰু বন বিভাগ , অসমৰ উদ্যোগত বুঢ়ামায়ঙত আয়োজিত এই বন্যপ্ৰাণী সপ্তাহ উদযাপন কাৰ্যসূচীত উপস্থিত থাকে স্বাস্থ্য মন্ত্ৰী পীয়ুষ হাজৰিকা, বনমন্ত্ৰী পৰিমল শুক্লবৈদ্য , মন্ত্ৰী নৱ কুমাৰ দলৈ , বিধায়ক ৰমাকান্ত দেউৰী , অসম পৰ্যতন নিগমৰ অধ্যক্ষ জয়ন্ত মল্ল বৰুৱা আদিকে ধৰি বন বিভাগৰ শীৰ্ষ বিষয়াবৰ্গ ।