মৰিগাওঁ,19 ফেব্ৰুৱাৰীঃ মৰিগাঁৱত অচল পানী যোগান আঁচনি ৷ মৰিগাওঁ জিলাৰ ২নং বৰচলাৰ পঞ্চবৰী পানী যোগান আঁচনিখন বিগত পাঁচ-ছয়বছৰে পৰিত্যক্ত অৱস্থাত থকাৰ পিছতো বিভাগীয় কৰ্তৃপক্ষই কোনো ব্যৱস্থা গ্ৰহণ কৰা দেখা নগ’ল ৷ উল্লেখ্য যে,পঞ্চবৰী পানীযোগান আঁচনিখন পূৰ্বৰ কংগ্ৰেছ চৰকাৰৰ দিনত মোটা অংকৰ ধন ব্যয় কৰি নিৰ্মাণ কৰা হৈছিল ৷ পিছে চৰকাৰ সলনিৰ লগে লগে আঁচনিখন পৰিত্যক্ত অৱস্থাত পৰি ৰয় ৷
আনহাতে,বিগত সময়ছোৱাত পঞ্চবৰীবাসী ৰাইজে বিভাগীয় কৰ্তৃপক্ষক এই সন্দৰ্ভত অৱগত কৰে যদিও আজিকোপতি সাৰ পোৱা নাই কুম্ভকৰ্ণ নিদ্ৰাত অভ্যস্ত বিভাগটোৱে ৷ তদুপৰি এইক্ষেত্ৰত স্থানীয় বিধায়কগৰাকীৰো নাই কোনো অৰিহণা ৷ ফলত বিশুদ্ধ খোৱাপানীৰ পৰা বঞ্চিত হৈ আহিছে স্থানীয় জনসাধাৰণ ৷ আঁচনিখন কাৰ্যকৰী কৰিবলৈ চৰকাৰে এক সুকীয়া ট্ৰেন্সফৰ্মাৰৰো ব্যৱস্থা কৰিছিল বুলি উল্লেখ কৰে স্থানীয় লোকে । সম্প্ৰতি এই ট্ৰেন্সফাৰ্মাৰটোৱো বিকল অৱস্থাত আছে ৷ পৰ্যাপ্ত সকলো ব্যৱস্থা থকাৰ পিছতো আঁচনিখন কাৰ্যকৰী নোহোৱাত অঞ্চলবাসীয়ে ক্ষোভ উজাৰিছে চৰকাৰৰ ওপৰত ৷
উল্লেখ্য যে,আঁচনিখন সফল ৰূপায়ণৰ বাবে স্থানীয় ছাইফুল ইছলাম নামৰ মানৱ দৰদী লোকজনে দুই কঠা মাটিয়ো দান কৰিছিল । জনস্বাস্থ্য কাৰিকৰী বিভাগে ধন ঘটিবৰ কাৰণে এনে আঁচনি গ্ৰহণ কৰে বুলি ভুক্তভোগী ৰাইজে অভিযোগ উত্থাপন কৰিছে ।
লগতে চাওকঃপৰিৱেশৰ সুৰক্ষাৰ্থে পদযাত্ৰা কৰা নিজৰা ফুকন উপস্থিত উত্তৰ প্ৰদেশত
