মৰিগাঁও,১০ ছেপ্টেম্বৰ: সৰ্বাত্মক মিছন ইন্দ্ৰধনুষ ৫.০ ৰ জৰিয়তে ১১ ৰ পৰা ১৬ ছেপ্টেম্বৰলৈ দ্বিতীয় পৰ্যায়ত ২৭৩২ গৰাকীক টীকাকৰণৰ লক্ষ্য মৰিগাঁও জিলা স্বাস্থ্য বিভাগৰ । উল্লেখযোগ্য যে, মিছন ইন্দ্ৰধনুষ ৫.০ ৰ অধীনত তিনিটা পৰ্যায়ত টীকাকৰণৰ লক্ষ্য লোৱা হৈছে । প্ৰথম পৰ্যায়ত ৭ আগষ্টৰ পৰা ১২ আগষ্টলৈ মৰিগাঁও জিলাত ০ ৰ পৰা ৫ বছৰ বয়সৰ প্ৰায় ৩৪২৩ টি শিশু আৰু ৬৭২ গৰাকী গৰ্ভৱতী মহিলা অৰ্থাৎ মুঠ ৪০৯৫ গৰাকীক প্ৰতিষেধক প্ৰদান কৰা হয় ।
দ্বিতীয় পৰ্যায়ত ১১ ছেপ্টেম্বৰৰ পৰা ১৬ ছেপ্টেম্বৰলৈ মুঠ ২৭৩২ গৰাকী শিশু আৰু গৰ্ভৱতী মহিলাক প্ৰতিষেধক প্ৰদান কৰা হ'ব । ইয়াৰে ২০০৮ টি শিশু ০ ৰ পৰা ২ বছৰ বয়সৰ, ২৭১ টি শিশু ২ ৰ পৰা ৫ বছৰ বয়সৰ আৰু ৪৫৩ গৰাকী গৰ্ভৱতী মহিলা আছে । তৃতীয় পৰ্যায়ত ৯ অক্টোবৰৰ পৰা ১৪ অক্টোবৰলৈ টীকাকৰণ কৰোৱা হ'ব । এই মিছন ইন্দ্ৰধনুষ ৫.০ ত বিশেষভাৱে মিছলছ আৰু ৰুবেলাৰ দৰে ৰোগৰ বিৰুদ্ধে টীকাকৰণ কৰোৱা হ'ব ।
এই কাৰ্যসূচীৰ অধীনত নিয়মীয়া টীকাকৰণৰ পৰা বাদ পৰা বা আংশিকভাৱে প্ৰতিষেধক লোৱা ০ ৰ পৰা ৫ বছৰ বয়সৰ শিশু আৰু গৰ্ভৱতী মহিলাক প্ৰতিষেধক প্ৰদান কৰা হৈছে । অতিৰিক্ত জিলা আয়ুক্ত দ্যুতিভা বৰাই প্ৰতিষেধক ল'বলৈ বাকী থকা সকলো শিশুক প্ৰতিষেধক দিবলৈ আগবাঢ়ি আহিবলৈ অভিভাৱকসকলৰ প্ৰতি আহ্বান জনায় ।
ইতিমধ্যে এই সন্দৰ্ভত মৰিগাঁও জিলা আয়ুক্তৰ কাৰ্যালয়ৰ সভাকক্ষত অতিৰিক্ত জিলা আয়ুক্ত দ্যুতিভা বৰাৰ সভাপতিত্বত অনুষ্ঠিত হৈছিল জিলা টাস্ক ফৰ্চৰ এখন সভা । সভাত আই এম আই ৫.০ ৰ অধীনত দ্বিতীয় পৰ্যায়ত জিলাখনত টীকাকৰণ কৰিবলগীয়া শিশুৰ সঠিক হিচাপ, দুৰ্গম এলেকাসমূহত টীকাকৰণৰ ক্ষেত্ৰত ল'বলগীয়া যথোপযুক্ত ব্যৱস্থা, শিশু তথা গৰ্ভৱতী মহিলাৰ সবিশেষ তথ্য আদি বিষয়ৰ ওপৰত বিস্তৃতভাৱে আলোচনা কৰা হয় ।
সভাত অতিৰিক্ত জিলা আয়ুক্তগৰাকীয়ে মিছন ইন্দ্ৰধনুষ-৫.০ ৰ অধীনত জিলাখনত উপযুক্ত কোনো শিশু বা গৰ্ভৱতী মহিলা যাতে টীকাকৰণৰ পৰা বাদ নপৰে তাৰবাবে সংশ্লিষ্ট সকলো বিভাগকে সন্মিলিতভাবে দায়বদ্ধতাৰে প্ৰচেষ্টা আগবঢ়াবলৈ আহ্বান জনায় । তেওঁ কোনোধৰণৰ বেমেজালি নোহোৱাকৈ টীকাকৰণ প্রক্ৰিয়া সম্পন্ন কৰাৰ বাবে প্ৰয়োজনীয় ব্যৱস্থা গ্ৰহণ কৰিবলৈ সংশ্লিষ্ট বিভাগ তথা স্বাস্থ্য বিভাগৰ বিষয়া-কৰ্মচাৰীসকলক নিৰ্দেশ দিয়ে ।
