নিশাৰ অন্ধকাৰত দাৰে ঘপিয়াই হত্যা এজনক

মৰিগাঁৱৰ বৰিবন্ধাত নিশা সংঘটিত হয় এক চাঞ্চল্যকৰ হত্যাকাণ্ড ৷ একে গাঁৱৰে কেইজনমান মদ্যপায়ী যুৱকৰ আক্ৰমণত এজন নিহত হোৱাৰ লগতে আহত হয় পাঁচগৰাকীকৈ লোক ৷

মৰিগাঁৱ, 6 জুলাইঃ শুকুৰবাৰে নিশা মৰিগাঁৱৰ লাহৰীঘাট বৰিবন্ধাত সৃষ্টি হয় উত্তেজনাপূৰ্ণ পৰিস্থিতিৰ ৷ লাহৰীঘাট আৰক্ষী চকীৰ অন্তৰ্গত বৰিবন্ধা কৰৈতলী চুবুৰীত পথত বহি থকা অৱস্থাতে লাঠি-জোং-চোকা অস্ত্ৰৰে আক্ৰমণ কৰে পংকজ নাথ নামৰ এজন যুৱকৰ লগত অহা এটি যুৱকৰ দলে ৷ পংকজ নাথৰ নেতৃত্বত অহা যুৱকৰ দলটোৰ আক্ৰমণত ঘটনাস্থলীতে নিহত হয় ইব্ৰাহীম আলী নামৰ বয়োবৃদ্ধ লোকজন ৷ আনহাতে গুৰুতৰভাৱে আহত হয় মজিবুৰ ৰহমান, ৰাজু আলী, ইয়ামিন আলী, ইনামুল হক আৰু আয়ুব আলী নামৰ যুৱককেইজন ৷

কোনো কাৰণ নোহোৱাকৈ পংকজ নাথৰ দলটোৱে প্ৰথমে কাজিয়া কৰি তাৰ পিচত এইদৰে চোকা অস্ত্ৰৰে আক্ৰমণ কৰি হত্যা কৰে নিৰীহ লোকজনক ৷ ঘটনাৰ পিচতে গাঁৱখনৰ পৰিস্থিতি উত্তপ্ত হৈ পৰা আৰক্ষীয়ে আহি পৰিস্থিতি নিয়ন্ত্ৰণ কৰিবলৈ সক্ষম হোৱাৰ লগতে অভিযুক্ত পংকজ নাথক গ্ৰেপ্তাৰ কৰে ৷