মৰিগাঁৱত অব্যাহত বালি মাফিয়াৰ দৌৰাত্ম্যঃ ৰাইজে জব্দ কৰিলে বালি ভৰ্তি ডাম্পাৰ

কপিলীত অব্যাহত বালি মাফিয়াৰ দপদপনি ৷ একাংশ ক্ষুব্ধ ৰাইজে জব্দ কৰে দুখন বালি ভৰ্তি ডাম্পাৰ ৷ বন বিভাগৰ লোক জড়িত থকাৰ অভিযোগ স্থানীয় ৰাইজৰ ৷

মৰিগাঁও, 15 নৱেম্বৰ: কপিলীত অব্যাহত আছে অবৈধ বালি খনন ৷ ৰাইজৰ অভিযোগ অনুসৰি বন বিভাগৰ বিষয়াৰে মিলি নিতৌ পূৰ্ণগতিত চলিছে বালি ছিণ্ডিকেট ৷

দৈনিক 40-50খন ডাম্পাৰ, ট্ৰাক, টেক্টৰেৰে অবৈধভাৱে বালি কঢ়িয়াইছে কপিলী নৈৰ পৰা ৷

এই কাৰ্যত অতিষ্ঠ হৈ পৰা বৃহত্তৰ অঞ্চলটোৰ একাংশ ক্ষুব্ধ ৰাইজে বৃহস্পতিবাৰে নিশা জব্দ কৰে দুখন বালি ভৰ্তি ডাম্পাৰ ৷ কিয়নো, দৈনিক 40-50খন সৰু-বৰ গাড়ীৰে বালি কঢ়িয়াওৱাৰ ফলত বিনষ্ট হৈছে বৃহত্তৰ অঞ্চলটোৰ যাতায়াতৰ পথসমূহ ৷

স্থানীয় ৰাইজৰ অভিযোগ মতে, মৰিগাঁও জিলা বন বিভাগ আৰু ধৰমতুল বনাঞ্চলিক বিষয়াৰ লগত থকা গোপন যোগসূত্ৰৰ ফলতেই দৈনিক অব্যাহত আছে বালি মাফিয়াৰ গুণ্ডাৰাজ ৷

ঘটনাস্থলীত উপস্থিত আৰক্ষী

উল্লেখযোগ্য যে, অবৈধ বালি কঢ়িওৱাত বাধা প্ৰদান কৰা স্থানীয় ৰাইজক গাড়ীৰে মহতিয়াই নিয়াৰ ভাবুকি প্ৰদান কৰে বালি মাফিয়াই ৷

ঘটনাস্থলীত ধৰমতুল আৰক্ষী উপস্থিত হৈ জব্দ কৰে ডাম্পাৰ দুখন ৷ এই সন্দৰ্ভত স্থানীয় ৰাইজে অবৈধ বালি মাফিয়াক গ্ৰেপ্তাৰৰ দাবী জনায় জিলা প্ৰশাসনৰ ওচৰত ৷

লগতে পঢ়ক: ইটা ভাটাৰ বিৰুদ্ধে ধুবুৰীত প্ৰশাসনৰ উচ্ছেদ অভিযান