মৰিগাঁও, 12 চেপ্তেম্বৰ: এতিয়াৰে পৰা আধাৰ কাৰ্ডৰ বাবে দীঘলীয়া শাৰী পাতি হাট বজাৰত নিশা কটাব নালাগে মৰিগাঁৱৰ ৰাইজে ৷ অতি শেহতীয়াকৈ আধাৰ কাৰ্ড আবেদন কৰিবলৈ গৈ ৰাইজে দুৰ্ভোগ ভুগিব লগা হোৱাৰ বাতৰি সংবাদ মাধ্যমত প্ৰকাশ হোৱাৰ পাছতে তৎপৰ হৈ উঠিছে মৰিগাঁৱ জিলা প্ৰশাসন ৷ সকলোকে কভিড প্ৰটকল মানি চলিবলৈ আহ্বান জনাই মৰিগাঁও জিলা প্ৰশাসনে কয় যে অতি সোনকালেই জিলাখনত আধাৰ কাৰ্ড আবেদনৰ 60 টা নতুন কেন্দ্ৰ স্থাপন কৰা হ'ব ৷ সেয়ে ইমান খৰখেদা কৰাৰ কোনো প্ৰয়োজন নাই ৷
উল্লেখ্য যে ইটিভি ভাৰত অসমত আধাৰ কাৰ্ডৰ বাবে মৰিগাঁৱৰ ৰাইজে সন্মুখীন হোৱা দুৰৱস্থাৰ বাতৰি প্ৰকাশ হোৱাৰ মাথো 12 ঘন্টাৰ ভিতৰতে মৰিগাঁও জিলা প্ৰশাসনক তৎপৰ হৈ উঠা দেখা গ'ল ৷
শেহতীয়াকৈ আধাৰ কাৰ্ডৰ বাবে জিলাখনত থকা বিভিন্ন আবেদন কেন্দ্ৰত সৃষ্টি হৈ আহিছে দীঘলীয়া শাৰী ৷ দীঘলীয়া শাৰীত থিয় হোৱাৰ পাছতো আবেদন প্ৰক্ৰিয়া সম্পূৰ্ণ নোহোৱাত কাৰ্যালয়ৰ বাৰাণ্ডা,হাট,বজাৰ আদিত বহুজনে উজাগৰী নিশা কটোৱাৰ দৃশ্যও অতি সুলভ হৈ পৰিছে ৷ এই সমগ্ৰ পৰিৱেশ তথা ৰাইজৰ দুৰৱস্থাক লৈ ইটিভি ভাৰত অসমত বাতৰি প্ৰকাশ হোৱাৰ 12 ঘন্টাৰ ভিতৰতে মৰিগাঁও জিলা প্ৰশাসনে অতি তৎপৰ হৈ এতিয়া এই বিশেষ পদক্ষেপ গ্ৰহণ কৰিছে ৷
লগতে পঢ়ক : আধাৰ কাৰ্ড সংগ্ৰহৰ নামত উজাগৰী নিশা কটাইছে মৰিগাঁওবাসীয়ে
