মৰিগাঁও, 3 জানুৱাৰীঃ ঐতিহাসিক জোনবিল মেলাৰ বাবে প্ৰস্তুতি আৰম্ভ । পাহাৰ -ভৈয়ামৰ সম্প্ৰীতিৰ সাঁকো ঐতিহাসিক জোনবিল মেলা আগন্তুক ১৬ জানুৱাৰীৰ পৰা অনুষ্ঠিত হ'ব । ঐতিহাসিক জোনবিলৰ পাৰত তিনিদিনীয়া কাৰ্যসূচীৰে অনুষ্ঠিত হ'ব এই মেলা । মেলা কেইদিনত কোনো দল-সংগঠনক কোনো ধৰণৰ বন্ধ নিদিবলৈ আহ্বান উদযাপন সমিতিৰ । শুকুৰবাৰে মধ্য অসমৰ চহকী ৰজা গোভা দেওৰজাৰ ৰাজ পৰিষদে সংবাদমেল সম্বোধন কৰি সদৰী কৰে এই কথা ।
সাম্প্ৰতিক ৰাজ্যৰ পৰিস্থিতিৰ কথা দোহাৰি গোভা ৰাজ পৰিষদে কোনো দল-সংগঠনকে জোনবিল মেলাৰ বাবে সেইকেইটা দিনত কোনোধৰণৰ বন্ধ নিদিবলৈ আহ্বান জনাইছে । আনহাতে, ১৬ জানুৱাৰীৰ পুৱা গোভা ৰজা দীপসিং দেওৰজাই পতাকা উত্তোলন কৰিব আৰু দুপৰীয়া ডা-ডাঙৰীয়াৰ সৈতে জোন বিলৰ পাৰত প্ৰীতি ভোজ খাব বুলিও মত প্ৰকাশ কৰে । দুপৰীয়াৰ পৰা জোন বিলৰ পাৰত পাহাৰৰ মামা-মামী সকলে ধান খেৰৰ নৰাৰে অস্থায়ী পঁজা সাজিব । তাৰ পাচতে ১৭ জানুৱাৰীৰ পুৱতি নিশা মামা-মামী সকলে বিনিময় প্ৰথাত অংশগ্ৰহণ কৰিব। কৃষিজাত সামগ্ৰীৰ বিনিময় চানেকিৰে জিলিকি উঠিব জোনবিলৰ পাৰ । গোভা দেওৰজাৰ পৰম্পৰাগত আমন্ত্ৰণ ৰক্ষা কৰি ১৮ জানুৱাৰীত ৰাজ দৰবাৰত অংশ গ্ৰহণ কৰিব মধ্য অসমৰ ১৮ জন প্ৰতীকী তিৱা ৰজাই । এই ৰাজ দৰবাৰতে পৰম্পৰাগতা ৰজা সকলে লাভ কৰিব ৰাজভাট্টা । যুগ-যুগ ধৰি পাহাৰ -ভৈয়ামৰ সম্প্ৰীতিৰ সাঁকো হিচাপে চিহ্নিত হৈ অহা এই জোনবিল মেলালৈ সকলোৱ সহায়-সহযোগিতা কামনা কৰিছে গোভা ৰাজ দৰবাৰে আৰু জোনবিল মেলা সমিতিয়ে ।
