মৰিগাঁৱৰ স্বাধীনতা দিৱসৰ কাৰ্যসূচীত অংশগ্ৰহণ মন্ত্ৰী হিমন্ত বিশ্ব শৰ্মাৰ

শনিবাৰে মৰিগাঁৱত উদযাপিত স্বাধীনতা দিৱসৰ অনুষ্ঠানত পতাকা উত্তোলন কৰি মৰিগাঁঁও জিলাৰ বাবে চৰকাৰে গ্ৰহণ কৰা ভিন্ন আঁচনিৰ লগতে, বহু ৰাজনৈতিক বিষয়ত মন্তব্য আগবঢ়ায় স্বাস্থ্যমন্ত্ৰী ড৹ হিমন্ত বিশ্ব শৰ্মাই ৷

মৰিগাঁও, 15 আগষ্ট: মৰিগাঁও জিলা প্ৰশাসনৰ উদ্যোগত উদযাপিত স্বাধীনতা দিৱসৰ কাৰ্যসূচীত পতাকা উত্তোলন কৰি সংবাদ মাধ্যমেৰে হোৱা বাৰ্তালাপত মৰিগাঁৱৰ বাবে চৰকাৰে লোৱা ভিন্ন আঁচনিৰ লগতে, সমাগত নিৰ্বাচন আৰু ভিন্ন দল-সংগঠনসমূহৰ বিষয়েও উল্লেখ কৰে মন্ত্ৰী হিমন্ত বিশ্ব শৰ্মাই ৷ আছু জনপ্ৰিয় নে বিজেপি জনপ্ৰিয় সেই কথা 2021 ৰ নিৰ্বাচনত জনসাধাৰণে দেখুৱাই দিব বুলি উল্লেখ কৰে মন্ত্ৰী গৰাকীয়ে ৷ লগতে তেওঁ মন্তব্য কৰে যে, আছু এই প্ৰতিযোগিতা খনত আহিব নালাগিছিল ৷ এইখন প্ৰতিযোগিতাত আহি তেওঁলোকে সেই জাতীয় সংগঠনটোৰ মৰ্যদা কিমান কমাই দিলে তাৰ প্ৰত্যুত্তৰ জনতাই 2021 ৰ নিৰ্বাচনত দিব বুলি উল্লেখ কৰে মন্ত্ৰী গৰাকীয়ে ৷

আনহাতে শুকুৰবাৰে মন্ত্ৰী পিযুষ হাজৰিকাই কৰা এক মন্তব্যৰো প্ৰতিক্ৰয়া প্ৰকাশ কৰি তেওঁ কয়, মুখ্যমন্ত্ৰী হোৱাৰ যোগ্যতা অসমৰ সকলো লোকৰে আছে ৷ কিন্তু সেই কথাৰ নিৰ্ণয় কৰিব ৰাইজে ৷ আনহাতে কংগ্ৰেছ আৰু এআইইউডিএফৰ মিত্ৰতা সন্দৰ্ভতো মন্তব্য কৰে মন্ত্ৰী হিমন্ত বিশ্ব শৰ্মাই ৷ তেওঁ কয়, এতিয়া কংগ্ৰেছৰ পক্ষত যি এজন দুজন খিলঞ্জীয়া আছে সেইসকলো বিজেপিৰ পক্ষলৈ আহিব ৷ দুয়োটা দলৰে মিত্ৰতা হ'লে গোটেই কংগ্ৰেছ ভৱনটোৱেই আজমল ভৱনলৈ ৰূপান্তৰ হ'ব বুলি তেওঁ মন্তব্য কৰে ৷ তৰুণ গগৈয়ে 'হু ইজ আজমল' বুলি কৈ কৈ এতিয়া কংগ্ৰেছ দলটোকে আজমল কৰি দিলে ৷ এসময়ত তেওঁ কংগ্ৰেছ দলত থকাৰ বাবে দুঃখিত বুলিও কথ প্ৰসংগত উল্লেখ কৰে ৷

আনহাতে তেওঁ মৰিগাঁও জিলাৰ বাবে গ্ৰহণ কৰা ভিন্ন আঁচনি সন্দৰ্ভতো সংবাদ মাধ্যমযোগে উল্লেখ কৰে ৷ মন্ত্ৰী ড৹ হিমন্ত বিশ্ব শৰ্মাই মৰিগাঁৱত মেডিকেল কলেজ স্থাপন কৰা হ'ব বুলি জানিবলৈ দিয়ে ৷ ইয়াৰ প্ৰাৰম্ভিক কাম যাতে অতি শীঘ্ৰেই আৰম্ভ কৰিব পাৰে তাৰ বাবে জিলা প্ৰশাসনক 100 বিঘা মাটি দিবলৈ কয় ৷ জাগীৰোজৰ কাগজকলৰ যিখন চিকিৎসালয় অসম চৰকাকে লৈছিল তাতে আগন্তুক ডেৰ মাহৰ ভিতৰত এটা বিনামূলীয়া কিডনী ডায়েলেচিছ সেৱা আৰম্ভ কৰা হ'ব বুলি উল্লেখ কৰে তেওঁ ৷ দৰং আৰু মৰিগাঁও দুই জিলা সংযোগী দুখন দলং নিৰ্মাণৰ সমীক্ষাৰ কাম অব্যাহত আছে ৷ মৰিগাঁও চহৰৰ নলা-নৰ্দমা সমূহ নতুনকৈ নিৰ্মাণৰ বাবে চৰকাৰে প্ৰায় 30 কোটি টকাৰ আঁচনিও প্ৰস্তুত কৰিছে ৷ যাৰ কাম আৰম্ভ হ'ব ডিচেম্বৰ মাহৰ আগতে ৷ আচাৰ্য ইলাৰাম দাসৰ নামত নিৰ্মাণ কৰা হ'ব সংস্কৃতি ভৱন ৷ জিলাখনৰ বাবে এনে ধৰণৰ কেইবাটাও আঁচনি ঘোষণা কৰে মন্ত্ৰী গৰাকীয়ে ৷

লগতে পঢ়ক: স্বাধীনতা দিৱসৰ পুৱা টীয়কত ক'ভিড-19 আৰু স্বাস্থ্য সজাগতা চাইকেল ৰেলী