ধিং, ৪ জুন: ৰাজ্যৰ ভিন্ন প্ৰান্তত ড্ৰাগছৰ বিৰুদ্ধে আৰক্ষীৰ অভিযান অব্যাহত আছে । মৰিগাঁও জিলাতো ড্ৰাগছ তথা নিচাজাতীয় দ্ৰব্যৰ বিৰুদ্ধে আৰক্ষীৰ অভিযান অব্যাহত আছে । শুকুৰবাৰে মৰিগাঁও জিলাৰ ভেলৌগুৰি আৰক্ষীয়ে অভিযান চলাই হাহচৰা গাঁৱৰ জাকিৰ হুছেইন নামৰ এজন লোকৰ ঘৰৰপৰা ৫০ টা কন্টেইনাৰসহ তিনি ড্ৰাগছ সৰবৰাহকাৰীক গ্ৰেপ্তাৰ কৰিবলৈ সক্ষম হয় ।
উল্লেখ্য যে দীৰ্ঘ দিন ধৰি অঞ্চলটোত মাৰাত্মক ড্ৰাগছৰ ৰমৰমীয়া বেহা চলাই অহা এই কুখ্যাত ড্ৰাগছ সৰবৰাহকাৰী জাকিৰ হুছেইনে নাগালেণ্ডৰ ডিমাপুৰৰ পৰা চোৰাংভাৱে ড্ৰাগছ আনি হাহচৰা গাঁৱত থকা নিজৰ ঘৰৰ পৰাই ব্যৱসায় চলাই আছিল ।
আৰক্ষীয়ে গোপন সূত্ৰৰ পৰা লাভ কৰা তথ্যৰ ভিত্তিত অভিযান চলাই জাকিৰ হুছেইনৰ ঘৰৰ পৰা বুজন পৰিমাণৰ ড্ৰাগছসহ এটা ম'বাইল, ৫,৪৬০ টকা আৰু ৪৩ খন ম'বাইল চিম জব্দ কৰে । আৰক্ষীয়ে গ্ৰেপ্তাৰ কৰা ড্ৰাগছ ব্যৱসায়ী জাকিৰ হুছেইনৰ লগতে বিমলা খাতুন আৰু আজিজুল হক নামৰ আন দুগৰাকীৰ বিৰুদ্ধেও থানাত গোচৰ ৰুজু কৰি তিনিওকে মৰিগাঁও জিলাৰ জেললৈ প্ৰেৰণ কৰে ।
লগতে পঢ়ক: এইবাৰো নহয় মা কামাখ্যা মন্দিৰৰ বিশ্বপ্ৰসিদ্ধ অম্বুবাচী মেলা
