মায়ং, 15 জুন: পবিতৰা অভয়াৰণ্য কৰ্তৃপক্ষ আৰু মায়ং আৰক্ষীৰ যুটীয়া অভিযানত শনিবাৰে জব্দ হয় দুটাকৈ অত্যাধুনিক মাৰণাস্ত্ৰ ৷ গোপন সূত্ৰৰ পম খেদি পবিতৰাৰ কাষৰীয়া নেকেৰাহাবি গাঁৱৰ আনোৱাৰ হুইছেনৰ ঘৰৰ পৰা অভিযানকাৰীৰ দলটোৱে উদ্ধাৰ কৰে এই অবৈধ অস্ত্ৰসমূহ ৷ ইয়াৰোপৰি একেখন গাঁৱৰে চফিকুল ইছলাম ওৰফে চব্বু নামৰ লোকজনৰ ঘৰৰ পৰাও আৰক্ষীয়ে উদ্ধাৰ কৰিবলৈ সক্ষম হয় এটা হৰিণাৰ শিং ৷ আৰক্ষীয়ে প্ৰকাশ কৰা অনুসৰি পূৰ্বেও গঁড়ৰ চিকাৰৰ লগত জড়িত আছিল এই দুয়োটা চোৰাংচিকাৰী ৷
উল্লেখ্য যে, বাৰিষাৰ দুৰ্যোগৰ সময়চোৱাত অভয়াৰণ্যখনত বৃদ্ধি পায় চোৰাং চিকাৰীৰ প্ৰকোপ ৷ সেয়েহে, পবিতৰাৰ কাষৰীয়া অঞ্চলসমূহত চোৰাংচিকাৰীৰ বিৰুদ্ধে সমন্তৰালকৈ সষ্টম হৈ উঠিছে অভয়াৰণ্যৰ কৰ্তৃপক্ষ লগতে মায়ং আৰক্ষী ৷ শনিবাৰে আনোৱাৰ হুইছেন আৰু চফিকুল ইছলামৰ বাসগৃহৰ পৰা মাৰণাস্ত্ৰৰ লগতে হৰিণাৰ শিং উদ্ধাৰ কৰিবলৈ সক্ষম হয় যদিও অভিযানৰ উমান পাই পলাই সাৰিবলৈ সক্ষম হয় চোৰাংচিকাৰী দুটা ৷ দুয়োটা চোৰাংচিকাৰীকে আটক কৰিবলৈ আৰক্ষীৰ তদন্ত অব্যাহত ৷
