মাজুলী, 7 জুনঃ সত্ৰভূমি মাজুলীৰ এখন ঐতিহাসিক সত্ৰৰ এগৰাকী সত্ৰাধিকাৰৰ এইটো ভগা জুপুৰী । যোৱা ২ জুনত এইগৰাকী সত্ৰাধিকাৰৰ সংগ্ৰাম আৰু দাৰিদ্ৰতাই শীৰ্ণ কৰা জীৱনৰ বাতৰি প্ৰকাশ পাইছিল ইটিভি ভাৰত অসমত ৷ ইয়াৰ পাচতেই নৱ প্ৰজন্মৰ হাৰ্টথ্ৰব জুবিন গাৰ্গকো জোঁকাৰি গৈছিল এই সংবাদে । ইয়াৰ পাচতেই বৃহস্পতিবাৰে বিয়লি উপস্থিত হয় মাজুলী দলনি চামগুৰি সত্ৰৰ সত্ৰাধিকাৰৰ গৃহত । সত্ৰাধিকাৰৰ গৃহত উপস্থিত হৈ জুবিনে প্ৰতিশ্ৰুতি দিলে সত্ৰাধিকাৰ গৰাকীক সহায় কৰাৰ কথা । লগতে চৰকাৰ তথা ৰাইজকো এই ক্ষেত্ৰত দৃষ্টি দিবলৈ আহ্বান জনায় কণ্ঠশিল্পীগৰাকীয়ে ৷
সুদূৰ গুৱাহাটীৰ পৰা জুবিন গাৰ্গে সত্ৰাধিকাৰৰ খবৰ লোৱাৰ বিপৰীতে এগৰাকী সাংস্কৃতিক কৰ্মী মাজুলী জিলা প্ৰশাসনৰ মূৰব্বী হৈ থকাৰ পাছটো কোনো এজন লোকে খবৰ ল’বলৈ আহৰি নোহোৱাটোৱে এতিয়া সৃষ্টি কৰিছে প্ৰতিক্ৰিয়াৰ ৷
বাতৰি প্ৰকাশৰ পাচতো মাজুলী প্ৰশাসনে গুৰুত্ব নিদিয়াত এতিয়া তীব্ৰ প্ৰতিক্ৰিয়াৰ সৃষ্টি হৈছে মাজুলীৰ সৰ্বত্ৰে ৷ দৰিদ্ৰতাই কোঙা কৰা সত্ৰাধিকাৰ গৰাকীয়ে জুবিন গাৰ্গ আহি তেখেতৰ গৃহত উপস্থিত হোৱাত আনন্দিত হৈ এখন ফুলাম গামোচাৰে সম্ভাষণ জনায় ।
