মাজুলী, 30 নৱেম্বৰঃ শনিবাৰে মাজুলীৰ সীমান্তৱৰ্তী লখিমপুৰ সোৱণশিৰিৰ পাৰত লুইত খাৱলুৰ প্ৰায় পাঁচ সহস্ৰাধিক লোকে তীব্ৰ প্ৰতিবাদ সাব্যস্ত কৰে ৷ প্ৰতিবাদকাৰী সকলে জনোৱা অনুসৰি লক্ষীমপুৰ জিলাৰ লুইত খাবলু পঞ্চায়তৰ 43 খন গাঁৱৰ 20 হাজাৰ লোকে দীর্ঘ দিনে শিক্ষা স্বাস্থ্য, যাতায়ত, যোগাযোগ ,ব্যৱসায় আৰু বাণিজ্য সকলো দিশৰ পৰাই আদিম যুগৰ দৰে বসবাস কৰি আহিছে ৷ সেয়ে সমস্যাৰে জৰ্জৰিত খাবলুত পকি দলং নিৰ্মাণ, যাতায়ত-যোগাযোগ ব্যৱস্থা সুচল কৰি দিয়া আৰু শিক্ষা স্বাস্থ্য আদি উন্নয়ন সাধনৰ দাবীৰে প্ৰতিবাদকাৰী সকলে এই বিশাল প্ৰতিবাদ আৰু ৰাজহুৱা সভা অনুষ্ঠিত কৰে ৷
অঞ্চলটোৰ 43 খন গাঁৱৰ ৰাইজে অংশগ্ৰহণ কৰা সোৱণশিৰিৰ এই ৰাজহুৱা সভাত শ শ লোকে শ্ল'গান দি ৰজা ঘৰৰ দৃষ্টি আৰ্কষণৰ চেষ্টা কৰে ৷ প্ৰতিবাদী ৰাইজ সকলে লুইত আৰু খাবলুত পকী দলং নিৰ্মাণ , সোৱণশিৰি আৰু খেৰকতীয়া নদী খহনীয়া প্ৰতিৰোধ, শিক্ষা, যাতায়াত আৰু স্বাস্থ্যৰ ক্ষেত্ৰত ক্ষীপ্ৰ উন্নয়ন আদি বিভিন্ন দাবীৰে সোৱণশিৰিৰ পাৰ উত্তাল কৰি তোলে ৷
