মাজুলী, 6 ছেপ্তেম্বৰ: সত্ৰভূমি মাজুলীত খ্ৰীষ্টান ধৰ্মৰ আগ্ৰাসনৰ অভিযোগ কৰি তাৰ বিৰুদ্ধে সততে মাত মাতি অহা দক্ষিণপাট গৃহাশ্ৰমী সত্ৰৰ সত্ৰাধিকাৰ শ্ৰী শ্ৰী জনাৰ্দন দেৱ গোস্বামীক চমন জাৰি কৰিছে মাজুলী জিলা মুখ্য ন্যায়িক দণ্ডাধীশৰ আদালতে ৷ মহাপুৰুষ শংকৰদেৱ আৰু মাধৱদেৱৰ মণিকাঞ্চন ক্ষেত্ৰ হিচাপে পৰিচিত মাজুলীৰ ইতিহাসত এগৰাকী সত্ৰাধিকাৰক ন্যায়ালয়ে চমন জাৰি কৰা এইটোৱে প্ৰথম ঘটনা ৷
মন কৰিব লগীয়া যে হিন্দু ৰক্ষা সেনা নামৰ এটা হিন্দুত্ববাদী সংগঠনৰ অসম প্ৰভাৰী তথা অসম সত্ৰ মহাসভাৰ মাজুলী জিলা সমিতিৰ কাৰ্যকৰ্তা জনাৰ্দন দেৱ গোস্বামীৰ ওপৰত প্ৰশান্ত পায়েং নামৰ এজন এক ব্যক্তিয়ে গোচৰ ৰুজু কৰিছিল, এতিয়া সেই গোচৰ সন্দৰ্ভতে চমন জাৰি কৰা হৈছে সত্ৰাধিকাৰ গৰাকীক ৷ গোস্বামীয়ে বিগত সময়ত মাজুলীত খ্ৰীষ্টান বিৰোধী আন্দোলন আৰম্ভ কৰিবলৈ চেষ্টা কৰিছিল ৷ চমন জাৰি সন্দৰ্ভত সাংবাদিকৰ আগত নিজৰ প্ৰতিক্ৰিয়া ব্যক্ত কৰিছে সত্ৰাধিকাৰ শ্ৰী শ্ৰী জনাৰ্দন দেৱ গোস্বামীয়ে ৷ তেওঁ কয় যে সত্ৰ নগৰীখনত ব্যাপক হাৰত আৰম্ভ হোৱা খ্ৰীষ্টান আগ্ৰাসন ৰোধৰ বাবে তেওঁ মাত মাতি অহাৰ কাৰণে তেওঁৰ দৰে সত্ৰাধিকাৰো আইনৰ চকুত অভিযুক্ত হৈছে ৷
ইফালে সাংবাদিক আগত বহুতো বিতৰ্কিত মন্তব্যও আগবঢ়াই সত্ৰাধিকাৰ তথা হিন্দু ৰক্ষা সেনা অসম প্ৰভাৰী জনাৰ্দন দেৱ গোস্বামীয়ে ৷ তেওঁ কয়,"মুছলমান আৰু খ্ৰীষ্টানসকলক মাজুলীৰ পৰা খেদি পঠোৱা উচিত ৷" তেওঁ হিন্দুসকল বিপদৰ সন্মুখীন হোৱাৰ কথা সদৰি কৰি ভেটিকান চিটিত হিন্দুক মন্দিৰ বনাবলৈ দিব নে নাই বুলি সংবাদিকৰ আগত প্ৰশ্ন উত্থাপন কৰে ৷
সত্ৰাধিকাৰ গোস্বামীক এইদৰে ন্যায়ালয়ে চমন জাৰি কৰা কাৰ্যই এতিয়া নদীদ্বীপত কৃষ্টি-সংস্কৃতিৰ সংকট ঘনীভূত হোৱাৰ কথাকে সূচাইছে ৷ এফালে যদি মাজুলীৰ দুখীয়া নৈপৰীয়া জনজাতীয় লোক সকলৰ মাজত খ্ৰীষ্টান ধৰ্মৰ আগ্ৰাসন ঘটিছে আনফালে সত্ৰনগৰীত এতিয়া ঘটিছে হিন্দুত্ববাদৰ চৰম উত্থান ৷ আগন্তুক সময়ত সত্ৰাধিকাৰ গৰাকীৰ ওপৰত ৰুজু হোৱা গোচৰ সন্দৰ্ভত গোচৰ সন্দৰ্ভত ন্যায়ালয়ে কি ৰায় দিয়ে সেইয়া হে লক্ষণীয় হ'ব ৷
