মাজুলী,17 অক্টোবৰ: আজি অসমীয়াৰ বাপতি সাহোন কাতি বিহু । মাজুলীত কাতি বিহু শাৰদীয় মুখ্য উৎসৱ হিচাপে গণ্য কৰা হয় । কোভিড 19 ৰ সংক্ৰমণৰ মাজতে মাজুলীৰ আউনীআটী সত্ৰ, দক্ষিণপাট সত্ৰ, গড়মুৰ সত্ৰ আদিত পৰম্পৰা ৰক্ষা কৰি আকাশবন্তি প্ৰজ্বলন কৰে ৷ এইবেলি আউনীআটী সত্ৰত 367 বছৰীয়া পৰম্পৰাৰে উদযাপন কৰা হৈছে কাতি বিহু ৷ সত্ৰৰ প্ৰতিষ্ঠা কালৰে পৰা চলি আহিছে এই পৰম্পৰা ৷ তাৰ বাবে সত্ৰৰ কীৰ্তনঘৰৰ নিচেই কাষতে 21 যোৰা আকাশ বন্তি প্ৰজ্বলন কৰা হৈছে ৷ যদিওবা কাতি বিহুত ধৰ্মীয় আধ্যাত্মিকতা বেছি ৷
ধৰ্মীয় পৰম্পৰা অনুসৰি কাতি মাহটো দামোদৰ মাহ পূণ্য মাহ আৰু এই মাহত তুলসী ৰোপণ কৰিলে মানৱ জাতিৰ কল্যাণ সাধন হোৱাৰ লগতে 21 পুৰুষ উদ্ধাৰ হয় । সত্ৰৰ পৰম্পৰা অনুসৰি গায়ন-বায়ন, ঢ়ুলীয়া-খুলীয়া, ওজাপালি,নটুৱা-সংকীৰ্তন আদিৰ মাজেৰে সত্ৰাধিকাৰে সন্ধিয়া 21 যোৰ আকাশ বন্তি প্ৰজ্বলন কৰে । সত্ৰৰ কণ কণ বৈষ্ণৱসকলেও তুলসী ভেটি নিৰ্মাণ কৰি বন্তি প্ৰজ্বলন কৰে । মাজুলীৰ 35 খন সত্ৰই নিৰ্দিষ্ট পৰম্পৰা অনুসৰি কাতি বিহু পালন কৰে ৷ দক্ষিণপাট সত্ৰত 7 যোৰা আৰু গড়মূৰ সত্ৰত 3 যোৰা বন্তি প্ৰজ্বলন কৰা হৈছে । উত্তৰ কমলাবাৰী সত্ৰতো পৰম্পৰা অনুসৰি অনুষ্ঠিত হয় কাতি বিহু ।
লগতে চাওকঃ চাইকেলৰ ৰিঙত ঘুৰিছে যুগলৰ জীৱন
