মাজুলী, 27 জুলাই : ৰাজ্যত আন্তঃজিলা বন্ধ হৈ পৰা লগে লগে বন্ধ হৈ পৰে ফেৰী সেৱা (Ferry Service)সমূহো । মাজুলীৰ কমলাবাৰী-নিমাতী ফেৰী সেৱা, অফলামুখ-নিমাতী ফেৰী ঘাট (Ferry Ghat)ৰ ফেৰী সেৱাৰ লগতে দক্ষিণপাট-নিমাতী ফেৰী সেৱাকে ধৰি সকলো ফেৰী সেৱা বন্ধ হৈ পৰাত পাৰঘাটত দোকান দি পৰিয়াল পোহপাল দিয়া ক্ষুদ্ৰ ব্যৱসায়ীসকলৰো হৈ পৰিছে পানীত হাঁহ নচৰা অৱস্থা ৷ কিয়নো ফেৰী সেৱাৰ চলাচল হৈ থাকিলেহে তেওঁলোকৰ দোকানলৈ আগমন ঘটিব যাত্ৰীসকলৰ ৷ দোকান-বজাৰ বন্ধ হৈ পৰাৰ লগে লগে এই পৰিয়ালসমূহৰ একমাত্ৰ উপাৰ্জনৰ পথটোও বন্ধ হৈ পৰে ৷
ইয়াৰ ফলস্বৰূপে আৰ্থিক সমস্যা (Economic Problem)ত ভূগিবলগীয়া হৈছে এইসকল সৰ্বস্বান্ত লোক ৷ উপায়হীন হৈ উপাৰ্জনৰ পথ মোকলোৱাৰ বাবে কিছু সহায় আগবঢ়াবলৈ চৰকাৰক কাতৰ অনুৰোধ জনাইছে পাৰঘাটৰ ক্ষুদ্ৰ ব্যৱসায়ীসকলে ৷ ক’ভিড (Covid)য়ে দুৰ্যোগ নমাই আনিছে ফেৰীঘাটত দোকান-বজাৰ দি চলি থকা এই পৰিয়ালসমূহৰ জীৱনলৈ ৷
সম্প্ৰতি ক’ভিডৰ ত্ৰাসত ত্ৰাসিত সমগ্ৰ দেশ ৷
ক’ভিডৰ এই ভয়াৱহতাৰ প্ৰতি লক্ষ্য ৰাখি বৰ্তমানো ৰাজ্যত আংশিক লক ডাউন (Mini Lockdown) অব্যাহত ৰাখিছে প্ৰশাসনে ৷ কিন্তু বিগত বৰ্ষৰ পৰাই এই লক ডাউনে জুৰুলা কৰিছে বিভিন্ন খণ্ডত কৰ্মৰত লোকসকলক ৷ বিশেষকৈ ব্যৱসায়ীসকলৰ আৰ্থিক উপাৰ্জনত ব্যাপক প্ৰভাৱ পেলাইছে এই লক ডাউনে ৷ ইয়াৰ ব্যতিক্ৰম নহয় মাজুলীৰ ফেৰিঘাটৰ এইসকল ক্ষুদ্ৰ ব্যৱসায়ী ৷
লগতে পঢ়ক : চাহ বাগিচাসমূহত অবৈধ সুৰাৰ প্ৰচলনেই যক্ষ্মা ৰোগৰ অন্যতম কাৰণ
