মাজুলী,6 ফেব্ৰুৱাৰী: পোনপটীয়া পথ যোগাযোগ ব্যৱস্থাৰে শীঘ্ৰে উত্তৰ অসম তথা অৰুণাচল প্ৰদেশৰ সৈতে মাজুলীক সংযোজিত কৰিবলৈ গুৰুত্বপূৰ্ণ পদক্ষেপ গ্ৰহণ কৰিছে অসম চৰকাৰে ৷ ৰাজ্যত পথ-যোগাযোগ আন্তঃগাঠনিৰ আমূল পৰিৱৰ্তন সাধনৰ লক্ষ্যৰে অসম চৰকাৰে ৰূপায়ণ কৰিবলৈ লোৱা 5000 কোটি টকীয়া 'অসম মালা' কাৰ্যসূচীৰ দ্বাৰা গ্ৰহণ কৰা হৈছে এক গুৰুত্বপূৰ্ণ সিদ্ধান্ত ৷ 'অসম মালা' কাৰ্যসূচীৰ অন্যতম গুৰুত্বপূৰ্ণ উপাদান হিচাপে লখিমপুৰ জিলাৰ বিহপুৰীয়াৰে মাজুলীক সংযোগ কৰাকৈ সোৱণশিৰিৰ ধূনাগুৰি ঘাটত নিৰ্মাণ কৰা হ'ব 1.4 কিলোমিটাৰ দৈৰ্ঘৰ এখন বৃহৎ পকী দলং ৷ অহা 7 ফেব্ৰুৱাৰীত ঢেকিয়াজুলিত প্ৰধানমন্ত্ৰী নৰেন্দ্ৰ মোডীয়ে অসম চৰকাৰৰ অতি গুৰুত্বপূৰ্ণ পথ-যোগাযোগ আন্তঃগাঠনিৰ উন্নয়নমূলক কাৰ্যসূচী 'অসম মালা'ৰ কাৰ্যৰূপায়ণ প্ৰক্ৰিয়া আনুষ্ঠানিক ভাৱে শুভাৰম্ভণি কৰাৰ পাছতে ৰাজ্যৰ লোকনিৰ্মাণ(পথ) বিভাগে মাজুলী-বিহপুৰীয়া সংযোগী এই দলংখনৰ নিৰ্মাণ কাৰ্য চলিত মাহৰ পৰাই আৰম্ভ কৰিবলৈ ইতিমধ্যে প্ৰস্তুতি চলাইছে ৷ আগন্তুক তিনি বছৰৰ ভিতৰতে সম্পূৰ্ণ হ'ব লগা এই দলং নিৰ্মাণৰ বাবে ইতিমধ্যে লোকনিৰ্মাণ (পথ) বিভাগে বিতং প্ৰকল্প প্ৰতিবেদন (ডিপিআৰ) প্ৰস্তুত কৰি উলিয়াইছে ৷ এই ডিপিআৰ অনুসৰি সোৱণশিৰি নদীৰ ওপৰত নিৰ্মাণ হ'ব লগা এই দলংখনৰ উপৰি নামনি মাজুলীৰ কানিয়াজানতো এখন 400 মিটাৰ দৈৰ্ঘৰ পকী দলং নিৰ্মাণ কৰা হ'ব ৷ লগতে বালিচাপৰিৰ পৰা মালাপিন্ধা-কানিয়াজান-1নং আউনিবাৰী হৈ লখিমপুৰ জিলাৰ ধূনাগুৰিলৈ গড়কাপ্টানী পথছোৱা আসল-বহলকৈ নিৰ্মাণ কৰি ৰাজ্যিক ঘাইপথ ৰূপে উন্নীত কৰা হ'ব ৷
উল্লেখ্য যে, 'বালিচাপৰিৰ পৰা ধূনাগুৰি সংযোগী পথ উন্নীতকৰণ আঁচনি' শীৰ্ষক এই সমগ্ৰ প্ৰকল্পৰ বাবে ডিপিআৰত মুঠ 770 কোটি টকাৰ মুঠ প্ৰকল্প ব্যয় নিৰ্ধাৰণ কৰা হৈছে ৷ এই পথ তথা দলং নিৰ্মাণ প্ৰকল্পৰ বাবে প্ৰয়োজনীয় ভূমি অধিগ্ৰহণৰ বাবে জৰীপ কাৰ্যও ইতিমধ্যে অন্তিম স্তৰত উপনীত হৈছে ৷ লখিমপুৰ জিলাৰ মাজেৰে উত্তৰ অসম তথা অৰুণাচল প্ৰদেশৰ ৰাজধানী ইটানগৰকো মাজুলীৰ পৰা পোনপটীয়া পথ-যোগাযোগেৰে ওচৰ চপাই অনাৰ পথ প্ৰশস্ত কৰিব এই গুৰুত্বপূৰ্ণ পথ তথা দলং নিৰ্মাণ প্ৰকল্পই ৷ মুখ্যমন্ত্ৰী সৰ্বানন্দ সোণোৱালৰ বিশেষ আগ্ৰহত নামনি মাজুলীৰ বালিচাপৰিৰ পৰা লখিমপুৰ জিলাৰ বিহপুৰীয়া সংযোগী সোৱণশিৰিৰ ধূনাগুৰি দলং তথা পথ নিৰ্মাণ প্ৰকল্প ক্ষিপ্ৰতাৰে ৰূপায়ণৰ উদ্যোগ লৈছে ৰাজ্যৰ লোকনিৰ্মাণ (পথ) বিভাগে ৷ 'অসম মালা'ৰ অধীনৰ এই পথ-দলং নিৰ্মাণ প্ৰকল্প সম্পূৰ্ণ হৈ উঠিলে নিশ্চিত ভাৱে মাজুলীৰ লগতে সমগ্ৰ উত্তৰ অসমত পথ যোগাযোগ আন্তঃগাঠনি অভাৱনীয় উন্নয়নৰ লগতে জনজীৱনতো সুদূৰপ্ৰসাৰী ইতিবাচক পৰিবৰ্তনৰ সূচনা হ'ব ৷
লগতে পঢ়কঃ চিৰাঙত হাতী দাঁত আৰু মাৰণাস্ত্ৰসহ এন ডি এফ বি সদস্য গ্ৰেপ্তাৰ
