এতিয়াৰ পৰা ৰঙালাওৰ গুটি পেলাই দিয়াৰ পূৰ্বে দহবাৰ ভাবিব

কেৱল ৰঙালাওয়েই নহয় ইয়াৰ বীজো আমাৰ স্বাস্থ্যৰ বাবে অতিকৈ উপকাৰী ৷ আজি ইয়াৰ কিছুমান উপকাৰিতাৰ বিষয়ে জানো আহক-

নিজকে সুস্থ, সবল আৰু নিৰোগী কৰি ৰাখিবলৈ বৰ্তমান সময়ত প্ৰতিগৰাকী লোকেই বিশেষ যত্ন লয় ৷ স্বাস্থ্যসন্মত জীৱনশৈলীৰ লগতে সঠিক খাদ্যাভ্যাসে এগৰাকী ব্যক্তিক সুস্বাস্থ্যৰ অধিকাৰী কৰি তোলে ৷ স্বাস্থ্য বিশেষজ্ঞসকলে নিজকে সুস্থ কৰি ৰাখিবলৈ এগৰাকী ব্যক্তিয়ে দৈনন্দিন খাদ্যাভ্যাস কিদৰে পালন কৰিব লাগে সেই সম্পৰ্কে বহু সময়ত মতামত আগবঢ়াইছে ৷ আমি বিভিন্ন সময়ত তেওঁলোকৰ মতামত ভালদৰে মন নকৰাৰ ফলত কিছুমান সহজলভ্য অথচ স্বাস্থ্যৰ বাবে পৰম উপকাৰী খাদ্যদ্ৰৱ্যৰ কথা অজ্ঞাত হৈ ৰওঁ ৷

বিশেষজ্ঞসকলে বহু সময়ত কিছুমান বীজৰ আচৰিত উপকাৰিতা সম্পৰ্কে মত প্ৰকাশ কৰা দেখিবলৈ পোৱা যায় ৷ তেনে এক উপকাৰী বীজ হৈছে ৰঙালাওৰ গুটি ৷ আকাৰত সৰু হ’লেও ৰঙালাও গুটিৰ দেহত অনন্য উপকাৰিতা সাধনৰ ক্ষমতা আছে ৷ প্ৰতিদিনে মাত্ৰ এচামুচ ৰঙালাও গুটিয়ে আপোনাৰ দেহক মূল্যৱান উপকাৰিতা প্ৰদান কৰিব ৷ ৰঙালাও গুটি দেহৰ বাবে প্ৰয়োজনীয় বহু পুষ্টিকৰ উপাদানৰে ভৰপূৰ ৷

এই বীজ হৃদযন্ত্ৰৰ স্বাস্থ্যৰ পৰা আৰম্ভ কৰি মগজুৰ কাৰ্যক্ষমতা উন্নত কৰালৈকে সকলোতে বিশেষভাৱে সহায়ক ৷ ৰঙালাও গুটিত প্ৰচুৰ পৰিমাণে মেগনেছিয়াম থাকে, যি ৰক্তচাপ নিয়ন্ত্ৰণ কৰাত সহায় কৰে ৷ হৃদযন্ত্ৰক সঠিকভাৱে কাম কৰাত সহায় কৰে ৷ ৰঙালাও গুটিত লগতে এন্টিঅক্সিডেন্ট আৰু স্বাস্থ্যকৰ চৰ্বি থাকে, এইসমূহে বেয়া কলেষ্টেৰল (LDL) হ্ৰাস কৰে আৰু ভাল কলেষ্টেৰল (HDL) বৃদ্ধি কৰে ৷

ৰঙালাও গুটিত ট্ৰিপ্ট’ফেন নামৰ এবিধ এমিনো এচিড থাকে, ই আপোনাৰ শৰীৰত প্ৰাকৃতিক টোপনিৰ হৰম’ন – চেৰ’টনিন আৰু মেলাটনিন উৎপাদন কৰাত সহায় কৰে ৷ শোৱাৰ পূৰ্বে এচামুচ ৰঙালাও গুটি খালে ভাল টোপনি আহে ৷ ইয়াত থকা মেগনেছিয়ামে আপোনাৰ পেশী আৰু স্নায়ু অধিক শিথিল কৰি তোলে ৷ এই বীজ স্মৃতিশক্তি বৃদ্ধি কৰাতো সহায়ক হয় ৷ বিশেষকৈ ইয়াত থকা জিংকে স্নায়ুৰ সংকেত প্ৰদান আৰু মগজুৰ বিকাশত গুৰুত্বপূৰ্ণ ভূমিকা পালন কৰে ৷

ইয়াত প্ৰচুৰ পৰিমাণে জিংক আৰু ভিটামিন ই থাকে ৷ ৰোগ প্ৰতিৰোধ ক্ষমতা বৃদ্ধি কৰা আৰু সংক্ৰমণৰ পৰা ৰক্ষা কৰাত এই দুটা হৈছে অত্যন্ত গুৰুত্বপূৰ্ণ পুষ্টিকৰ উপাদান ৷ জিংকে ঘাঁ ভাল কৰাত আৰু চৰ্দিৰ বিৰুদ্ধে যুঁজ দিয়াত সহায় কৰে, আনহাতে ভিটামিন ই- এ এন্টিঅক্সিডেন্ট হিচাপে কাম কৰে, প্ৰদাহ কমায়, আৰু আপোনাৰ ৰোগ প্ৰতিৰোধ ক্ষমতা শক্তিশালী কৰি ৰাখে ৷

ভাল হজম শক্তি হৈছে ব্যক্তিৰ সামগ্ৰিক স্বাস্থ্যৰ ভেটি ৷ অন্ত্ৰৰ বাবে ৰঙালাও গুটি যথেষ্ট উপকাৰী ৷ ইয়াত উপলব্ধ ফাইবাৰে পাচনত সহায় কৰে, কোষ্ঠকাঠিন্য ৰোধ কৰে আৰু সুষম আন্ত্ৰিক মাইক্ৰ’বায়’মক প্ৰসাৰিত কৰে ৷ ৰঙালাও গুটিৰ প্ৰাকৃতিক এন্টিপেৰাচাইটিক গুণে আন্ত্ৰিক ক্ষতিকাৰক বেক্টেৰিয়া নিৰ্মূল কৰাত সহায় কৰে আৰু আপোনাৰ পাচনতন্ত্ৰ সুস্থ কৰি ৰাখে ৷

ইয়াৰ উপৰিও ৰঙালাওৰ গুটি খালে-

• ঘাঁ ভাল হোৱাত সহায় কৰে

ভিটামিন কে আৰু মেংগানিজ ৰঙালাওৰ গুটিত প্ৰচুৰ পৰিমাণে পোৱা যায়, যিয়ে শৰীৰৰ ঘাঁবোৰ অতি সোনকালে শুকুৱাত সহায় কৰে ৷ সেয়েহে দৈনিক ৰঙালাওৰ গুটি সেৱন কৰিব লাগে ৷

• ৰক্তশৰ্কৰা নিয়ন্ত্ৰণ কৰা

ৰঙালাওৰ গুটিত মেগনেছিয়াম প্ৰচুৰ পৰিমাণে পোৱা যায়, যিয়ে শৰীৰত তেজৰ শৰ্কৰাৰ মাত্ৰা নিয়ন্ত্ৰণ কৰাত সহায় কৰে ৷ এইবোৰ ডায়েবেটিছ ৰোগীৰ বাবে ঔষধ ৷

• ফুলা হ্ৰাস কৰে

ৰঙালাওৰ গুটিত বহুতো এন্টিঅক্সিডেন্ট পোৱা যায়, গতিকে ই শৰীৰৰ প্ৰদাহ কমোৱাত সহায় কৰে ৷ বহু ধৰণৰ ৰোগো ইয়াৰ সেৱনৰ দ্বাৰা আঁতৰত থাকে ৷

• বেক্টেৰিয়া আৰু ভাইৰাছৰ পৰা ৰক্ষা কৰে

ভিটামিন কে আৰু মেংগানিজৰ উপৰিও ৰঙালাওৰ গুটিত জিংকো পোৱা যায়, যাৰ ফলত শৰীৰৰ ৰোগ প্ৰতিৰোধ ক্ষমতা শক্তিশালী হয় ৷ ইয়াৰ লগতে শৰীৰক বেক্টেৰিয়া আৰু ভাইৰাছৰ পৰাও ই ৰক্ষা কৰে ৷

• হাড় শক্তিশালী কৰে

ৰঙালাওৰ গুটিত জিংক আৰু মেগনেছিয়াম প্ৰচুৰ পৰিমাণে পোৱা যায় ৷ শৰীৰত প্ৰচুৰ পৰিমাণে মেগনেছিয়াম থাকিলে হাড় শক্তিশালী হয় ৷

• ৰক্তচাপ নিয়ন্ত্ৰণ কৰে

ৰঙালাওৰ গুটি সেৱন কৰিলে ৰক্তচাপ নিয়ন্ত্ৰণত থাকে, যাৰ ফলত হৃদৰোগৰ সম্ভাৱনা কম হয় ৷

উৎস:-https://pmc.ncbi.nlm.nih.gov/articles/PMC9182978/

(সতৰ্কীকৰণ: এই প্ৰতিবেদনত আপোনাক দিয়া সকলো স্বাস্থ্য তথা জীৱনশৈলী সম্পৰ্কীয় যিকোনো তথ্য আৰু পৰামৰ্শ কেৱল আপোনাৰ সাধাৰণ তথ্যৰ বাবেহে আগবঢ়োৱা হৈছে । আমি এই তথ্য বৈজ্ঞানিক গৱেষণা, অধ্যয়ন, চিকিৎসা আৰু স্বাস্থ্য পেছাদাৰী পৰামৰ্শৰ ভিত্তিত প্ৰদান কৰিছো । আপুনি এই উপায় বা পদ্ধতি অনুসৰণ কৰাৰ আগতে এই বিষয়ে বিতংভাৱে জনাটো উচিত তথা আপোনাৰ ব্যক্তিগত চিকিৎসকৰ পৰামৰ্শ গ্ৰহণ কৰাটো উচিত ।)

লগতে পঢ়ক