মাজুলী , 13 এপ্ৰিল : আজি অসমীয়াৰ হেঁপাহৰ ব’হাগ বিহুৰ উৰুকা ৷ সমান্তৰালভাৱে আজি পবিত্ৰ অশোকাষ্টমী ৷ সেই উপলক্ষে শনিবাৰে মাজুলীৰ দক্ষিণ পাট সত্ৰৰ সত্ৰাধিকাৰ সহিত সমূহ বৈষ্ণৱে ব্ৰহ্মপুত্ৰত স্নান কৰে ৷
পবিত্ৰ অশোকাষ্টমীত বুঢ়ালুইতত স্নান কৰিলে মাজুলীৰ সত্ৰাধিকাৰ বৈষ্ণৱে
হিন্দু শাস্ত্ৰৰ মতে মাঘী সপ্তমী আৰু অশোকাষ্টমীৰ দিনা মহাবাহু ব্ৰহ্মপুত্ৰ নদী দুদিনৰ বাবে পবিত্ৰ হয় । শাস্ত্ৰত উল্লেখ কৰা অনুসৰি অশোকাষ্টমীৰ পবিত্ৰ দিনটোত ব্ৰহ্মপুত্ৰত স্নান কৰিলে ব্ৰহ্মপদ লাভ হয় ৷ সেয়ে আজি পুৱা দক্ষিণ পাট সত্ৰৰ সত্ৰাধিকাৰ গৰাকীৰ লগতে বৈষ্ণৱ সকলে ফুল তুলসী নৈবেদ্য আদি আগবঢ়াই ব্ৰহ্মপুত্ৰত স্নান কৰি বেদৰ মন্ত্ৰোচ্ছাৰণ কৰে ৷ স্নানৰ পাচত সত্ৰাধিকাৰ ননীগোপাল গোস্বামীয়ে ভগৱৎ আৰাধনা কৰাৰ লগতে সমূহ অসমবাসীলৈ আগন্তুক ৰঙালী বিহুৰ শুভেচ্ছা জনায় ।
