লখিমপুৰ, ১৬ ছেপ্টেম্বৰ:"সৰ্প দংশন মানেই মৃত্যু নহয় । সৰ্প দংশন মানুহ আৰু সাপৰ এক সংঘাত । "এই মন্তব্য ডাঃ সুৰজিত গিৰিৰ । এইদৰে মন্তব্য় কৰি তেওঁ কয় যে সৰ্প দংশনৰ শক্তিশালী আধুনিক চিকিৎসা ব্যবস্থা আছে । সময়মতে চিকিৎসা প্ৰদান কৰিলে যি কোনো সৰ্পই দংশন কৰা ৰোগী নিশ্চিত ভাৱে সুস্থ হয় । সৰ্প দংশনৰ চিকিৎসাৰ ক্ষেত্রত অন্তৰায় হ'ল অন্ধ বিশ্বাস, বেজ -বেজালিৰ চিকিৎসা । যাৰ বাবে ৰোগীয়ে প্ৰাণ হেৰুওৱাৰ সম্ভাৱনা বেছি ।
ডাঃ সুৰজিত গিৰিই কয় যে অসমত ১৩ শতাংশ সাপহে বিষধৰ । আন সাপৰ দংশন প্ৰাণঘাতী নহয় । এনে বিষহীন সাপে দংশন কৰা লোকক বেজালি কৰি ভাল কৰা বুলি বেজে দাবী কৰে । জৰা-ফুকা আদি অন্ধবিশ্বাসৰ পৰা এতিয়াও বুজন সংখ্যক লোক মুক্ত হ'ব পৰা নাই বুলি মন্তব্য কৰিছে সৰ্প দংশনৰ ক্ষেত্রত সামাজিক সজাগতা সৃষ্টিৰ হকে কাম কৰা ডাঃ সুৰজিত গিৰিয়ে । লখিমপুৰ জিলা যুটীয়া স্বাস্থ্য সেৱা সঞ্চালকৰ কাৰ্যালয়ৰ উদ্যোগত শনিবাৰে চিকিৎসক সকলক লৈ আয়োজন কৰা সৰ্প দংশনৰ চিকিৎসা আৰু সজাগতা শীৰ্ষক প্ৰশিক্ষণত সমল ব্যক্তি হিচাপে অংশগ্রহণ কৰা ডাঃ গিৰিয়ে এনেদৰে কয় ।
