লখিমপুৰ, 7 আগষ্ট : ৰাজ্যত বানপানীৰ সমান্তৰালভাবে অব্যাহত আছে গৰাখহনীয়া ৷ ইতিমধ্যে, গৰাখহনীয়াত জাহ গৈছে ৰাইজৰ কৃষিভূমি, ভেঁটি-মাটি সকলো ৷ চৰকাৰে গৰাখহনীয়া ৰোধ কৰাৰ বাবে চেষ্টা অব্যাহত ৰাখিছে যদিও ৰোধ কৰিব পৰা নাই গৰাখহনীয়া ৷ চৰকাৰৰ সমান্তৰালভাবে ৰাজ্য়ৰ সচেতন ৰাইজেও গৰাখহনীয়া ৰোধ কৰাৰ বাবে চেষ্টা অব্যাহত ৰাখিছে ৷
লখিমপুৰ জিলাতো গৰাখহনীয়াই এক প্ৰকাৰ তাণ্ডৱ সৃষ্টি কৰিছে ৷ ডিক্ৰং নদীৰ গৰাখহনীয়াই অঞ্চলবাসীৰ মাজত ত্ৰাসৰ সৃষ্টি কৰিছে ৷ অঞ্চলবাসী ৰাইজে গৰাখহনীয়া সমস্যা ৰোধ কৰিবৰ বাবে জিলাখনৰ মেনেহা ডিক্ৰং ভুুমি সংৰক্ষন এলেকাত স্থানীয় ডিক্ৰংপৰীয়া মিলিজুলি পথাৰ পৰিচালনা সমিতিয়ে ৰোপন কৰিছিল মুল্যবান গছপুলি । আনকি, ডিক্ৰংপৰীয়া মিলিজুলি পথাৰ পৰিচালনা সমিতিৰ এই পদক্ষেপক আদৰণি জনাইছিল স্থানীয় 5 খন গাঁৱৰ ৰাইজে ৷
কিন্তু, তেওঁলোকে ৰোপন কৰা গছপুলি সমূহ বৃহস্পতিবাৰৰ নিশা দুষ্টচক্ৰই গোপনে গছপুলি সমূহ উভালি পেলোৱাৰ ঘটনাই অঞ্চলজুৰি সচেতন মহলৰ মাজত তীব্ৰ চাঞ্চল্যৰ সৃষ্টি কৰিছে ৷ তেওঁলোকে ৰোপন কৰা গছপুলিসমূহ উভালি দিয়াৰ লগতে গছপুলিৰ চাৰিওফালে দিয়া বেৰসমূহ নষ্ট কৰি দিয়া বুলিও জানিব পৰা গৈছে ৷
আনহাতে, এই ঘটনাৰ পিচত স্থানীয় ৰাইজে আৰক্ষী তথা বন বিভাগক বিষয়টো অৱগত কৰি দোষীক উপযুক্ত শাস্তি দিয়াৰ দাবী উখাপন কৰিছে ৷ যিসময়ত সেউজী ধৰণী গঢ়াৰ স্বাৰ্থত নৈপৰীয়া ৰাইজে মূৰৰ ঘাম মাটিত পেলাই গছপুলি সমূহ ৰোপন কৰিছিল, সেই সময়তে দুষ্কৃতিকাৰীৰ এনে কৰ্মকাণ্ডত জাঙুৰ খাই উঠিছে অঞ্চলবাসীৰ লগতে স্থানীয় দল সংগঠনে ৷
লগতে পঢ়ক : কুম্ভকৰ্ণ নিদ্ৰাত বন বিভাগঃআৰক্ষীয়ে জব্দ কৰিলে শিলৰ মহল
