বিহপুৰীয়া,1 নৱেম্বৰঃ বৃহস্পতিবাৰে নিশা লখিমপুৰৰ নাৰায়ণপুৰত সংঘটিত হয় শোকাৱহ পথ দুৰ্ঘটনা ৷ নাৰায়ণপুৰৰ দিশে গৈ থকা এখন তীব্ৰ বেগী ছুইফ্ট ডিজায়াৰ বাহনে মদাৰগুৰুত নিয়ন্ত্ৰণ হেৰুৱাই দ-খাৱৈত বাগৰি পৰে ৷ দুৰ্ঘটনাটোৰ পাচতেই স্থানীয় ৰাইজৰ সহযোগত কৌশিক বৰা নামৰ এজন যুৱকক মৃত অৱস্থাত উদ্ধাৰ কৰা হয় ৷ ইপিনে,বাহনখনত থকা আন এজন যুৱক দেৱজিৎ বৰাক পুৱা মৃত অৱস্থাত উদ্ধাৰ কৰে এচ ডি আৰ এফ বাহিনীয়ে ৷
প্ৰাপ্ত তথ্য অনুসৰি,বৃহস্পতিবাৰে নিশা প্ৰায় 11 মান বজাত AS-O7G-4188 নম্বৰৰ ছুইট ডিজেয়াৰ বাহন দুৰ্ঘটনাগ্ৰস্ত হয় ৷ দুৰ্ঘটনাটোত কৌশিক বৰা আৰু দেৱজিৎ বৰা নামৰ দুজন যুৱক নিহত হয়,আনহাতে আহত হয় আন এজন ৷ দুৰ্ঘটনাটো সংঘটিত হোৱাৰ পাচতেই বাহনখনৰ পৰা কথমপি ওলাই আহে আহত যুৱকজন ৷ যুৱকজনে চিঞৰ-বাখৰ কৰাত ঘটনাস্থলীত উপস্থিত হয় স্থানীয় ৰাইজ ৷ ইয়াৰ পাচত স্থানীয় ৰাইজ আৰু SDRF দলৰ সহযোগত আৰম্ভ কৰে উদ্ধাৰ অভিযান ৷ পানীৰ পৰা প্ৰথমে কৌশিক বৰাক উদ্ধাৰ কৰা হয় আৰু তাৰ পাচতেই পুৱা SDRF বাহিনীয়ে উদ্ধাৰ কৰে চালকৰ আসনত থকা দেবজিৎ বৰাৰ মৃতদেহ ৷
লগতে পঢ়কঃ বকোত অচিনাক্ত বাহনৰ খুন্দাত বৃদ্ধৰ মৃত্যু
