বিহপুৰীয়া, 21 এপ্ৰিলঃ বিহপুৰীয়াত দুই কিলোমিটাৰ দীঘল পথ নিৰ্মাণ কৰি সংবাদ শীৰ্ষত আহিছে বৰপথাৰ আৰু জৰাবাৰী গাঁৱৰ স্থানীয় যুৱক-যুৱতীসকল ৷ দুয়োখন গাঁৱৰ যুৱক-যুৱতীসকলে বিগত 30 বছৰে চৰকাৰে সম্পন্ন কৰিব নোৱাৰা কাম সম্পন্ন কৰি আদৰ্শ দাঙি ধৰিছে ৷
হুঁচৰিৰ ধনেৰে নিৰ্মাণ দুই কিলোমিটাৰ দৈৰ্ঘ্যৰ পথ
বিহুৰ সময়ত হুচৰি মাৰি সংগ্ৰহ কৰা সমষ্ট ধন এটি পথ নিৰ্মাণৰ বাবে দান কৰিছে ৷ কেৱল ধনেই নহয় পথটো নিৰ্মাণৰ বাবে শ্ৰমদানো কৰিছে স্থানীয় যুৱক-যুৱতীসকলে ৷ বিগত 30 বছৰে অনাদৃত হৈ পৰি থকা এই পথটো হৈছে বিহপুৰীয়া সমষ্টিৰ অন্তৰ্গত নাৰায়ণপুৰ উন্নয়ন খণ্ডৰ 2নং বৰপথাৰ-জৰাবাৰী সংযোগী পথ ৷ বিভাগীয় কৰ্তৃপক্ষৰ হেমাহিৰ ফলতে এইদৰে দুয়োখন গাঁৱৰ ডেকা-বৃদ্ধ সকলোৱে একগোট হৈ বিহু হুঁচৰি মাৰি সংগ্ৰহ কৰা ধনেৰে পথটো মেৰামতি কৰে ৷
