লখিমপুৰ, ৩১ আগষ্ট : লখিমপুৰত চতুর্থ দিনৰ বাবেও অব্যাহত আছে বানৰ প্ৰকোপ । বৰ্তমানো বানৰ কবলত আছে জিলাখনৰ অৰ্ধশতাধিক গাঁও । যোৱা সোমবাৰৰ পৰা লখিমপুৰ জিলাত আৰম্ভ হোৱা ভদীয়া বানৰ প্ৰভাৱ চতুর্থ দিনাও অব্যাহত আছে । মূষলধাৰ বৰষুণৰ ফলত জিলাখনৰ নৈসমূহে সৃষ্টি কৰা প্ৰলয়ে শতাধিক গাঁও বুৰাই পেলোৱাৰ লগতে বিনষ্ট হৈছে শ শ হেক্টৰ কৃষিভূমি । সম্প্ৰতি বানৰ প্ৰকোপ সামান্য হ্ৰাস পোৱা পৰিলক্ষিত হৈছে ৷
জিলা প্ৰশাসনৰ তথ্য মতে, জিলাখনত ৪৬ খন গাঁও এতিয়াও বানৰ কবলত আছে । বিহপুৰীয়া ৰাজহ চক্ৰত ১৬ খন, ঢকুৱাখনা ৰাজহ চক্ৰত ৬ খন, নাৰায়ণপুৰ ৰাজহ চক্ৰত ৯ খন আৰু লখিমপুৰ ৰাজহ চক্ৰত ১৫ খন গাঁও বানৰ কবলত আছে ।
বান আৰম্ভ হোৱাৰ চাৰিদিনৰ পাচতো একাংশ নৈৰ জলপৃষ্ঠ এতিয়াও বিপদজ্জনক ৰূপত বৈ আছে । ব্ৰহ্মপুত্ৰ নদীৰ জলপৃষ্ঠ জামুগুৰিত বিপদ সীমাৰ ১.২৪ মিলিমিটাৰ ওপৰত আছে । তেনেদৰে সোৱণশিৰি নৈৰ জলপৃষ্ঠ ঘনচৰাইত ৭৭ মিলিমিটাৰ আৰু শিলিখাগুৰিত বিপদ সীমাৰ ৭৭ মিলিমিটাৰ ওপৰত আছে ।
লখিমপুৰত ভদীয়া বানৰ তাণ্ডৱত আন অঞ্চলসমূহৰ উপৰিও ঘূণাসুঁতিও বিপৰ্যস্ত হৈছে । লখিমপুৰ জিলাৰ ঘূণাসুঁতি অঞ্চলৰ কেইবাখনো গাঁও যেনে বালিভেটা, নাহৰণী, উজানতলি, মাধৱপুৰ আৰু মহৰা বৰচাপৰি আদি এতিয়াও পানীৰ তলত আছে । ফলত খাদ্যৰ অভাৱত ভুগিছে বানাক্ৰান্তই ।
সমান্তৰালকৈ খাদ্যৰ অভাৱে জুৰুলা কৰিছে পশুধনকো । একেটা মাহত ৬ বাৰকৈ বানপানী হোৱাৰ পাচতো জিলা প্ৰশাসনে কোনো ধৰণৰ খবৰ নোলোৱাৰ অভিযোগ উত্থাপিত হৈছে । মূলতঃ কৃষি আৰু পশুপালন কৰি জীৱিকা নিৰ্বাহৰ কৰি আহিছে ঘূণাসুঁতিবাসীয়ে । কিন্তু এইবাৰ বলিয়া বানে সকলো তচনচ কৰি পেলালে ।
শষ্য ক্ষেত্ৰ বিনষ্ট হোৱাৰ লগতে এই বানত পোহনীয়া হাঁহ-কুকুৰা, গাহৰি, গৰু-গাই উটি গ’ল । চৌদিশে কেৱল অথাই সাগৰ সদৃশ পৰিৱেশ ৷ কোনোমতে প্ৰাণটো লৈ এতিয়া পেটত ভোক, মনত ক্ষোভ লৈ দুচকুত অনিদ্ৰাৰে সময় পাৰ কৰিব লগীয়া হৈছে ।
লগতে পঢ়ক : Flood in Majuli : ভদীয়া বানৰ কবলত মাজুলীৰ নৈ পৰিয়া অঞ্চল; বানৰ বাবে বন্ধ বিদ্যালয়
