লখিমপুৰ, 30 নৱেম্বৰ: পৰিভ্ৰমী পখীৰে মুখৰিত হৈ পৰিছে নাওবৈচাৰ শতজান জলাশয়(Migratory birds in Shatjan reservoir in Naobaicha) ৷ দেশী- বিদেশী পৰিভ্ৰমী পখীৰ কল-কাকলিত মুখৰিত হৈ পৰিছে নাওবৈচাৰ শতজান জলাশয় । দেশ বিদেশৰ পৰা বিভিন্ন প্ৰজাতিৰ পক্ষী আহি ভিৰ কৰিছেহি লখিমপুৰ জিলাৰ অন্তৰ্গত নাওবৈচাৰ এই জলাশয়টোত ।
ৰঙানদীৰ পাৰৰ পহুমৰাত ১২২ বিঘা মাটিৰে আবৃত শতজান জলাশয়ত প্ৰত্যেক বছৰৰ দৰে এইবাৰো শীতৰ আগমনৰ লগে লগে বিভিন্ন দেশ বিদেশৰ পৰিভ্ৰমী পক্ষীৰ আগমন ঘটা পৰিলক্ষিত হৈছে । লগে লগে জলাশয়টোয়ে ন ৰূপত জীৱন্ত হৈ পৰা দেখিবলৈ পোৱা গৈছে(Tourist place Shatjan reservoir in Naobaicha) ৷ শীতৰ সময়চোৱাত শতজান জলাশয়লৈ ১১বিধ পৰিভ্ৰমী পক্ষীৰ আগমন ঘটাৰ লগতে আন ২৩ বিধ স্থানীয় পক্ষীৰো আগমন ঘটিছে, যিয়ে ৰাজ্যবাসীক আকৰ্ষিত কৰাৰ লগতে দেশী-বিদেশী পৰ্যটককো আকৰ্ষিত কৰিবলৈ সক্ষম হৈছে ।
প্ৰাকৃতিক জৈৱ-বৈচিত্ৰ্যৰে পৰিপূৰ্ণ শতজান জলাশয়লৈ প্ৰতি বছৰৰ দৰে এইবাৰো ছাইবেৰিয়া, শ্ৰীলংকা, ম্যানমাৰ, জাপান, নেপাল আদি দেশৰ পৰা পক্ষীৰ আগমন ঘটিছে । কেৱল পৰিভ্ৰমী পক্ষীয়েই নহয় শতজান জলাশয়ত প্ৰায় দহটা বিভিন্ন প্ৰজাতিৰ তৰু-তৃণৰ লগতে এশটা প্ৰজাতিৰ দ্বিবীজপত্ৰী উদ্ভিদ ,২০বিধ ভিন্ন প্ৰজাতিৰ একবীজপত্ৰী উদ্ভিদ আৰু কুৰিটা প্ৰজাতিৰ ঢেঁকীয়া জাতীয় উদ্ভিদেৰে পৰিপূৰ্ণ শতজান জলাশয় ।
শীত আহিলেই কুঁৱলীৰ আৱৰণ ফাঁলি কাহিলি পুৱাতেই জলাশয়টোৰ চৌদিশৰ পৰা জাক পাতি নামি অহা হাজাৰ হাজাৰ দেশী-বিদেশী পক্ষীয়ে নান্দনিক পৰিৱেশৰ সৃষ্টি কৰিছে, যি পৰিৱেশ উপভোগ কৰিবলৈ ভিৰ কৰেহি স্থানীয় প্ৰকৃতিপ্ৰেমীসকলে । জাক পাতি নামি অহা পক্ষীৰ পাখিৰ ধপ-ধপনিত পুৱতি নিশাই সাৰ পাই উঠে শতজান আৰু ইয়াৰ চৌপাশৰ মানুহ ৷
সাত সাগৰ তেৰ নদী অতিক্ৰমী দিন ৰাতি একাকাৰ কৰি চৰাইবোৰ আহে আৰু যায় শতজান আৰু অন্যান্য জলাশয়লৈ । পৰিভ্ৰমী চৰায়ে নান্দনিক পৰিৱেশৰ সৃষ্টি কৰিলেও নাওবৈচাৰ শতজান জলাশয়ে চৰকাৰ-প্ৰশাসনৰ দৃষ্টিত গুৰুত্ব লাভ নকৰাৰ অভিযোগ উত্থাপিত হৈ আহিছে ৷
শতজান জলাশয় নাওবৈচাক পৰ্যটনথলী হিচাবে গঢ়ি তোলাৰ বাবে ব্যৱস্থা গ্ৰহণৰ বাবে আহ্বান জনায় স্থানীয় সচেতন ৰাইজে ৷
লগতে পঢ়ক: Nyubu Nyegam Yerko in Arunachal Pradesh: জনজাতীয় শিক্ষাৰে চলা অৰুণাচলৰ এখন বিশেষ বিদ্যালয়
