লখিমপুৰ, ৮ জুন : লখিমপুৰ জিলাৰ নাওবৈছাৰ দলহাট চাহ বাগিছাত ১৬ দিন পূৰ্বে কবৰ দিয়া মৃতদেহ খান্দি উলিয়াই মৰণোত্তৰ পৰীক্ষাৰ বাবে প্ৰেৰণ কৰিলে ফৰেনছিক দলে । যোৱা ২০ মে'ত অৰুণাচলৰ বিধায়ক তিচি কা'চৰ নাহৰলগুণৰ বুৰুং বস্তিৰ বাসগৃহত বনকৰা হিচাপে থকা দলহাট চাহ বাগিছাৰ যজ্ঞেশ্বৰ নাগৰ কন্যা বিচি নাগৰ মৃতদেহ চিপ লোৱা অৱস্থাত উদ্ধাৰ হৈছিল । ১২ বছৰীয়া কিশোৰী গৰাকীৰ মৃতদেহ উদ্ধাৰ হোৱাৰ পাছতে নাহৰলগুণ আৰক্ষীয়ে পৰিয়ালক বুজাই - বঢ়াই বাগিছাত মৃতদেহ কবৰ দি দায়িত্ব সামৰিছিল ।
কিন্তু সমগ্ৰ ঘটনাৰ পাছতে ৰহস্যৰ গোন্ধ পাই স্থানীয় আৰক্ষীয়ে নাহৰলগুণ আৰক্ষীৰ সৈতে লগলাগি কাষ চাপে চাহ জনজাতি ছাত্ৰ সন্থাৰ । অৱশেষত ছাত্ৰ সংগঠনটোৱে ৰাষ্ট্ৰীয় শিশু সুৰক্ষা সমিতিৰ কাষ চাপে আৰু সমিতিৰ সদস্য আৰু ফৰেনছিক বিশেষজ্ঞৰ দলে আৰক্ষীৰ সৈতে উপস্থিত হৈ শনিবাৰে খান্দি উলিয়ালে কিশোৰী গৰাকীৰ মৃতদেহ । বৰ্তমান মৰণোত্তৰ পৰীক্ষাৰ বাবে প্ৰেৰণ কৰা প্ৰতিবেদনতহে স্পষ্ট হ'ব প্ৰকৃততে অৰুণাচলৰ বিধায়ক গৰাকীৰ ঘৰত কিশোৰী গৰাকীয়ে আত্মহত্যা কৰিলে নে এইয়া এক পৰিকল্পিত হত্যাকাণ্ড ।
