লখিমপুৰ, 27 ডিচেম্বৰ: লখিমপুৰৰ চিয়াজুলিত শনিবাৰে নিশা সংঘটিত এক বিধ্বংসী অগ্নিকাণ্ডত লক্ষাধিক টকাৰ সা-সম্পত্তি ভস্মীভূত হৈছে ৷ বগীনদী আৰক্ষী থানাৰ অন্তৰ্গত চিয়াজুলিত মাজনিশা সংঘটিত এই অগ্নিকাণ্ডৰ ফলত তিনিখনকৈ দোকান জুইত জাহ যায় ৷
ঘটনাৰ বিৱৰণী অনুসৰি শনিবাৰে নিশা 11 বজাত চিয়াজুলি লীলাবস্তিৰ চুৰামনি উপাধ্যায় নামৰ ব্যক্তি গৰাকীৰ চাইকেলৰ দোকানত প্ৰথমে জুইৰ সূত্ৰপাত ঘটি আৰু তাৰ পাছতে একেলগে থকা এখন ইলেকট্ৰনিকচৰ দোকান আৰু গেলামালৰ দোকানলৈ জুই বিয়পি পৰাত কাষৰ দোকান কেইখন সম্পূৰ্ণৰূপে ভস্মীভূত হয় ৷
আটাইকেইখন দোকানেই চুৰামনি উপাধ্যায় নামৰ ব্যক্তি গৰাকীৰ যদিও ইয়াৰে ইলেকট্ৰনিকচৰ হেম বাহাদুৰ বিশ্বকৰ্মা নামৰ যুৱকজনৰ বুলি জানিব পৰা গৈছে ৷ ভুক্তভোগীয়ে জানিবলৈ দিয়া মতে ঘটনাৰ পাছতে ওচৰ চুবুৰীয়াৰ সহযোগত দোকানৰ মালিকে জুই নুমুৱাবলৈ চেষ্টা কৰি ব্যৰ্থ হোৱাত গোটেই নিশা জুইকুৰা জ্বলি দোকান গৃহৰ লগতে দোকান কেইখনত থকা লক্ষাধিক টকাৰ সা সম্পত্তি ভস্মীভূত হয় ৷
