নাওবৈচা, ৭ ছেপ্টেম্বৰ : ৰাজ্য চৰকাৰৰ নিৰ্দেশমৰ্মে চৰকাৰী ভূমিত অবৈধভাৱে বসবাস কৰা লোকসকলৰ উচ্ছেদ অভিযান অব্যাহত আছে (Assam Govt Eviction drive on government land) ৷ ইতিমধ্যে ৰাজ্যৰ আন আন বনাঞ্চলত অবৈধভাৱে বসবাস কৰা লোকসকলক ৰাজ্য চৰকাৰে উচ্ছেদ কৰিছে । ইয়াৰ সমান্তৰালভাৱে লখিমপুৰৰ পাভ সংৰক্ষিত বনাঞ্চলতো উচ্ছেদ চলোৱাৰ বাবে ৰাজ্য চৰকাৰৰ সাজু হৈছে (Eviction drive to Pabha Reserve Forest) ।
উল্লেখযোগ্য যে ৪৯০০ বৰ্গকিলোমিটাৰজোৰা ৰাণী ভিক্টোৰিয়াৰ যুগতে অভয়াৰণ্য হিচাপে স্বীকৃতি পোৱা বনৰীয়া ম'হৰ বাবে বিখ্যাত পাভ বনাঞ্চলৰ সৰহ সংখ্যক ভূমিয়েই সন্দেহজনক লোকে ঘৰ-বাৰী সাজি বেদখল কৰি আহিছিল (Pabha wildlife sanctuary) । যাৰ ফলত বনাঞ্চলখন জন অৰণ্যলৈ পৰিণত হয় (Encroachment in pabha wildlife sanctuary) । শেহতীয়াভাৱে ৰাজ্য চৰকাৰে পাভ বনাঞ্চলখন উচ্ছেদ চলোৱাৰ বাবে প্ৰস্তুতি আৰম্ভ কৰিছে ।
ইতিমধ্যে হাৰমতি আঞ্চলিক বন কাৰ্যালয়ৰ পৰা বনাঞ্চলখনত অবৈধভাৱে বেদখল কৰা পৰিয়ালসমূহলৈ ১৫ দিনৰ সময়সীমা বান্ধি জাননী প্ৰেৰণ কৰিছিল যদিও অবৈধ বেদখলকাৰীয়ে বনাঞ্চলখন এৰি যোৱা নাছিল । আজি পুনৰ দ্বিতীয়বাৰৰ বাবে লখিমপুৰ প্ৰশাসন আৰু বন বিভাগৰ এটা দলে বেদখলকাৰীৰ ঘৰে ঘৰে গৈ অন্তিম সকীয়নি দিয়ে । যদিহে স্ব-ইচ্ছাৰে বেদখলকাৰীয়ে বনাঞ্চলখন এৰি নাযায় তেনেহ'লে অহা ৯ ছেপ্টেম্বৰত প্ৰশাসনে উচ্ছেদ অভিযান চলাব বুলি জনায় ।
ইফালে বন বিভাগৰ পৰা জাননী লাভ কৰাৰ পিছতে বনাঞ্চলখনত অবৈধভাৱে বসবাস কৰি থকা একাংশ লোকে নিজৰ নিজৰ প্ৰয়োজনীয় সা-সম্পত্তি লৈ অন্য স্থানলৈ গৈছে যদিও বহু পৰিয়াল এতিয়াও বনাঞ্চলখনতে বাহৰ পাতি আছে । উল্লেখ্য, বনাঞ্চলৰ ভূমিত কেৱল সন্দেহজনক লোকেই বসবাস কৰা নাছিল । বনাঞ্চলখনত মিচিং জনগোষ্ঠীয় বহু পৰিয়ালেও ভূমি বেদখল কৰি সৰিয়হ-ধানখেতি কৰি ব্যাপক বেদখল কৰি আহিছে ।
আনহাতে, দৰঙৰ গৰুখুঁটিৰ দৰে ঘটনাৰ পুনৰাবৃত্তি নহওক বুলিয়ে তেওঁলোকে উচ্ছেদৰ পূৰ্বেই নিজৰ ঘৰ-দুৱাৰ এৰি অন্য স্থানলৈ যাবলৈ আৰম্ভ কৰিছে । লগতে যিসকল দালালে তেওঁলোকক ধনৰ বিনিময়ত বনাঞ্চলখনত মাটি প্ৰদান কৰিছিল, তেওঁলোকৰ ওপৰতো বিহিত ব্যৱস্থা গ্ৰহণৰ দাবী ভুক্তভোগী লোকসকলৰ ৷ ইয়াৰ লগতে চৰকাৰৰ ওচৰত তেওঁলোকক পুনৰ সংস্থাপনৰ ব্যৱস্থা কৰিবলৈও দাবী জনাইছে লোকসকলে ৷
লগতে পঢ়ক :সুন্দৰী বেংক বিষয়াক জোৰদাৰ জেৰা আৰক্ষীৰ
