বিহপুৰীয়া, 26 জুন : নাৰায়ণপুৰৰ বনপুৰৈ জামুগুৰিত মহাবাহু ব্ৰহ্মপুত্ৰৰ প্ৰৱল খহনীয়াত গৃহহীন হোৱা ২৫ টা পৰিয়ালক অসম চৰকাৰৰ তৰফৰ পৰা আৰ্থিক সাহায্য প্ৰদান কৰা হয় । খহনীয়াস্থলিত অনুষ্টুপীয়াকৈ আয়োজন কৰা এক অনুষ্ঠানত স্থানীয় বিধায়ক ড৹ অমীয় কুমাৰ ভূঞা আৰু তেজপুৰ লোকসভা সমষ্টিৰ সাংসদ পল্লৱলোচন দাসে খহনীয়াগ্ৰস্ত পৰিয়াল সমূহৰ মাজত ২৫ হাজাৰ টকাৰ চেক প্ৰদান কৰে ৷ মুখ্যমন্ত্ৰীৰ কাৰ্যালয়ৰ পৰা আগবঢ়োৱা এই সাহায্যৰ ধন অঞ্চলটোৰ ২৫ টা পৰিয়ালৰ মাজত বিতৰণ কৰা হয় ।
সাহায্য বিতৰণ অনুষ্ঠানটোত লখিমপুৰ জিলা উপায়ুক্ত গৰাকীৰ উপৰিও নাৰায়ণপুৰ আৰু বিহপুৰীয়া ৰাজহচক্ৰ বিষয়াদ্বয়েও অংশগ্ৰহণ কৰে । অনুষ্ঠানৰ পাচতে সাংবাদিকৰ আগত সাংসদ পল্লৱলোচন দাসে কয়, মুখ্যমন্ত্ৰী ড৹ হিমন্ত বিশ্ব শৰ্মাই নাৰায়ণপুৰৰ বনপুৰৈ জামুগুৰিৰ যিসকল লোকে গৰাখহনীয়াৰ কৱলত পৰি গৃহহীন হৈ পৰিছে সেই সকলক তাৎক্ষণিকভাৱে সাহায্য প্ৰদানৰ ব্যৱস্থা কৰে ৷ সেই অনুসৰি মুখ্যমন্ত্ৰীয়ে প্ৰতিটো পৰিয়ালক একাকালীন সাহায্য হিচাপে 25 হাজাৰ টকাকৈ প্ৰদান কৰিবলৈ অনুমোদন আগবঢ়াই বুলি সদৰি কৰে সাংসদ গৰাকীয়ে ৷
উল্লেখ্য যে, মুখ্যমন্ত্ৰী ড৹ হিমন্ত বিশ্ব শৰ্মাই নাৰায়ণপুৰত নিৰ্মাণ হৈ থকা মাধৱদেৱ কলাক্ষেত্ৰ পৰিদৰ্শন কৰিবলৈ অহা সময়তে বিহপুৰীয়াৰ বিধায়ক ড৹ অমীয় কুমাৰ ভূঞাই গৰাখহনীয়াত গৃহহীন হোৱা পৰিয়ালৰ কথা অৱগত কৰিছিল ৷ তদুপৰি পৰিয়াল সমূহক কিছু আৰ্থিক সাহায্য প্ৰদান কৰিবলৈ বিধায়কগৰাকীয়ে মুখ্যমন্ত্ৰী ড৹ হিমন্ত বিশ্ব শৰ্মাক অনুৰোধ জনাইছিল ৷
সংবাদ মাধ্যমৰ আগত বিহপুৰীয়াৰ বিধায়ক অমীয় কুমাৰ ভূঞাই কয়, বনপুৰৈ জামুগুৰিত মহাবাহু ব্ৰহ্মপুত্ৰৰ প্ৰৱল খহনীয়াত বহু পৰিয়াল গৃহহীন হোৱাৰ লগতে বহু পৰিয়ালৰ খেতি-মাটি ব্ৰহ্মপুত্ৰৰ বুকুত জাহ গৈছে ৷ পৰিয়াল সমূহক কিছু সহায়ৰ বাবে ব্যৱস্থা গ্ৰহণ কৰিবলৈ মাধৱদেৱ কলাক্ষেত্ৰ পৰিদৰ্শন কালতে মুখ্যমন্ত্ৰীক অৱগত কৰা হৈছিল ৷ সেই সময়তে মুখ্যমন্ত্ৰী গৰাকীয়ে তাৎক্ষণিকভাৱে সাহায্য প্ৰদান কৰাৰ আশ্বাস দিছিল বুলি সদৰি কৰে বিধায়ক ড৹ অমীয় কুমাৰ ভূঞাই ৷
"সেই প্ৰতিশ্ৰুতিৰ মতে মুখ্যমন্ত্ৰীয়ে পৰিয়াল সমূহৰ বাবে আগবঢ়োৱা এককালীন সাহায্য প্ৰদান কৰিবলৈ পাই আনন্দ প্ৰকাশ কৰিছো ৷ বিহপুৰীয়া সমষ্টিবাসীয়ে মুখ্যমন্ত্ৰীক ধন্যবাদ জনোৱাৰ লগতে বিহপুৰীয়াৰ বিধায়ক হিচাপে মুখ্যমন্ত্ৰী ড৹ হিমন্ত বিশ্ব শৰ্মাক ধন্যবাদ জনাইছো ৷ "সাংবাদিকৰ আগত এইদৰে কয় বিধায়ক ড৹ অমীয় কুমাৰ ভূঞাই ৷
