লখিমপুৰ,19 নৱেম্বৰ: ৰাজ্যত দিনে দিনে বাঢ়ি আহিছে সাংবাদিক নিগ্ৰহৰ ঘটনা ৷ সময়ে সময়ে এচামে সাংবাদিকক আক্ৰমণৰ লক্ষ্য কৰি লয় ৷ ইজনৰ পাছত সিজন সাংবাদিকক আক্ৰমণৰ পাছতে ৰাজ্যজুৰি আৰম্ভ হৈছে প্ৰতিবাদ ৷ তাৰ পাছতে দেশৰ সাংবাদিক সকলৰ ওপৰত বৃদ্ধি পোৱা আক্ৰমণ আৰু নিৰ্যাতনৰ বিৰুদ্ধে চাইকেল চলাই ৰাইজৰ মাজত সজাগতা সৃষ্টি কৰাৰ চেষ্টা অব্যাহত ৰাখিছে সাংবাদিক স্নেহাংকৰ চক্ৰৱৰ্তীয়ে ৷ সেই উদ্দেশ্যৰে বিশ্বনাথ জিলাৰ পৰা বগীনদীলৈ যোৱা সাংবাদিক স্নেহাংকৰ চক্ৰৱৰ্তীক বগীনদী প্ৰেছ ক্লাবৰ লগতে বগীনদী অঞ্চলৰ আন বহু দল সংগঠনে উষ্ম সম্বৰ্ধনা জনায় ৷
এহেজাৰ কিলোমিটাৰ চাইকেল চলাই সজাগতা সৃষ্টি কৰাৰ মন মেলিছে সাংবাদদিক গৰাকীয়ে ৷ বুধবাৰে বগীনদী প্ৰেছ ক্লাবত উপস্থিত হোৱা সাংবাদিক গৰাকীক ফুলৰ থোপা চেলেং চাদৰেৰে সম্বৰ্ধনা জ্ঞাপন কৰে ৷ তদুপৰি বগীনদী ব্যৱসায়ী সন্থা,আটাছু, কৈৱৰ্ত যুৱ ছাত্ৰ সন্মিলন,মানৱ অধিকাৰ সংস্থা,চুতীয়া ছাত্ৰ সন্থাইও সাংবাদিক গৰাকীক ফুলাম গামোচাৰে আদৰণি জনায় ৷
