লখিমপুৰ, 7 জুলাই : দীৰ্ঘদিন ধৰি চুবুৰীয়া ৰাজ্যসমূহৰ সৈতে চলি থকা সীমা বিবাদে অসমৰ সীমান্তৱৰ্তী জিলা সমূহৰ ৰাইজক অকল ক্ষতিগ্ৰস্ত কৰাই নহয় সময়ে সময়ে প্ৰাণৰ আশংকাতো পেলাইছে ৷ বিশেষকৈ অসম অৰুণাচল সীমান্ত(Assam Arunachal border), অসম নাগালেণ্ড সীমান্ত , অসম মিজোৰাম সীমান্ত এই সীমা বিবাদৰ বাবেই অশান্ত হৈ পৰিছে ৷ একেইখন ভাৰতবৰ্ষৰ অংগ ৰাজ্য হোৱা সত্বেও সীমা বিবাদৰ বাবেই এই ৰাজ্যসমূহৰ সীমান্তত প্ৰায়েই সৃষ্টি হৈ আহিছে যুদ্ধ-সদৃশ পৰিস্থিতিৰ ৷
শেহতীয়াকৈ পুনৰ অশান্ত হৈ পৰা হাইলাকান্দিৰ অসম-মিজোৰাম সীমান্ত(Assam Mizoram border), লখিমপুৰ জিলাৰ ঠাইয়ে ঠাইয়ে হোৱা অৰুণাচলীৰ অগ্ৰাসন নাইবা আগ্ৰাসী নগাই অসমৰ বিধায়কক আক্ৰমণ কৰাৰ ঘটনাই চিন্তিত কৰি তুলিছে ৰাজ্যৰ সচেতন মহলক ৷ এনে সময়তে এক গুৰুত্বপূৰ্ণ মন্তব্য কৰিছে ৰাজ্যৰ বনমন্ত্ৰী পৰিমল শুক্লবৈদ্যই ।
দেওবাৰে, ৰাজ্যৰ আৱকাৰী, মীনপালন আৰু বন বিভাগৰ মন্ত্ৰী পৰিমল শুক্লবৈদ্যই লখিমপুৰ ভ্ৰমণ কৰি জানিবলৈ দিয়ে যে, অচিৰেই কেন্দ্রীয় গৃহমন্ত্রী অমিত শ্বাহে(Union Home Minister Amit Shah) সীমা বিবাদ(border conflict)ৰ সমস্যা থকা উত্তৰ-পূৱৰ ৰাজ্যসমূহৰ মুখ্যমন্ত্রী সকলক লৈ মেঘালয়ত এক আলোচনাত মিলিত হ’ব আৰু দীৰ্ঘদিনীয়া এই সমস্যা সমাধানৰ প্ৰয়াস কৰিব ।
ইয়াৰ লগতে মন্ত্ৰী পৰিমল শুক্লবৈদ্যই মন্তব্য কৰে যে, এই সমস্যা সমাধানৰ হকে দেশৰ পূৰ্বৰ কোনো এখন চৰকাৰে উদ্যোগ গ্রহণ কৰা নাছিল ৷ কিন্তু বৰ্তমানৰ চৰকাৰে এই ক্ষেত্ৰত ব্যতিক্ৰমী পদক্ষেপ গ্রহণ কৰিছে । লখিমপুৰ জিলাত বেদখলৰ কবলত পৰা ৫ খনকৈ বনাঞ্চল বেদখল মুক্ত কৰাৰ কথাও উল্লেখ কৰি বিশেষকৈ, বেদখলৰ প্ৰকোপত ইতিমধ্যেই নিঃশেষ হৈ পৰা জিলাখনৰ পাভ বনাঞ্চলৰ ভূমি নতুনকৈ জৰীপ কৰি বনাঞ্চলখন পুনৰুদ্ধাৰ কৰা হ’ব বুলিও কয় মন্ত্ৰী গৰাকীয়ে ।
আনহাতে, অৰুণাচলী আৰু সন্দেহজনক লোকে অবৈধভাৱে দখল কৰা সংৰক্ষিত বনাঞ্চল সমূহ অতি সোনকালে বেদখল মুক্ত কৰা হ’ব বুলিও কয় মন্ত্ৰী গৰাকীয়ে । ৰাজ্যৰ আৱকাৰী বিভাগৰো দায়িত্বত থকা মন্ত্ৰী গৰাকীয়ে অৰুণাচলী সুৰা, চুলাই আদিৰ অবাধ প্ৰচলন ৰোধ কৰাৰ বাবেও উপায়ুক্ত তথা আৰক্ষী অধীক্ষকক প্ৰয়োজনীয় নিৰ্দেশ দিয়া বুলি সাংবাদিকৰ আগত প্ৰকাশ কৰে ।
লখিমপুৰ জিলাৰ উপায়ুক্তৰ কাৰ্যালয়ৰ সভাকক্ষত বন বিভাগ, আৱকাৰী আৰু মীন পালন বিভাগৰ জিলা উচ্চ পদস্থ বিষয়া সকলৰ সৈতে এখন পৰ্যালোচনা বৈঠকত মিলিত হৈ শুক্লবৈদ্যই জিলাখনৰ উন্নয়নৰ খতিয়ান লয় । ইয়াৰ পিছতে, মন্ত্ৰী গৰাকীয়ে সাংবাদিকক সম্বোধন কৰি কয় যে, বৰ্তমান চৰকাৰে বন আৰু মীনপালনৰ উন্নয়নৰ বাবে বিশেষ গুৰুত্ব আৰোপ কৰিছে । নতুনকৈ বনানীকৰণ কৰি সুজলা সুফলা অসম গঢ়াৰ বাবে বিভিন্ন আচঁনি হাতত লৈছে ।
লগতে পঢ়ক : অইলৰ নিযুক্তিত 4 জিলাৰ প্ৰাৰ্থীক প্ৰাধান্য: আলফা(স্বা)ৰ প্ৰতিক্ৰিয়া
