কোকৰাঝাৰ, 21 এপ্ৰিল : দেশৰ লগতে ৰাজ্যত ক'ভিডত আক্ৰান্ত ৰোগীৰ সংখ্যাই ভয়াবহৰূপ ধাৰণ কৰিছে ৷ সমান্তৰালভাৱে প্ৰশাসনে জাৰি কৰা ক'ভিড সংক্ৰান্তীয় নীতি-নিৰ্দেশনাৰ লগতে ব্যাপকভাৱে চৰ্চাত থকা লকডাউন প্ৰসংগই সকলোকে অনিশ্চয়তাৰ মাজলে লৈ গৈছে ৷ বিশেষ কৈ হাইস্কুল শিক্ষান্ত তথা হাইমাদ্ৰাছা পৰীক্ষা আৰু উচ্চতৰ মাধ্যমিকৰ শিক্ষাৰ্থীসকলৰ ক্ষেত্ৰত ব্যাপক অনিশ্চয়তাই দেখা দিছে ৷
মন কৰিবলগীয়া, অহা 12 মে'ৰ পৰা অনুষ্ঠিত হ'বলগীয়া হাইস্কুল শিক্ষান্ত তথা হাইমাদ্ৰাছা পৰীক্ষা অনুষ্ঠিত হ'ব নে নহয় ইয়াকে লৈ ছাত্ৰ-ছাত্ৰী তথা অভিভাৱক সকলৰ মাজত এক অনিশ্চিয়তাই দেখা দিছে ৷ ইয়াৰ মাজতে হাইস্কুল শিক্ষান্ত , হাইমাদ্ৰাছা আৰু উচ্চতৰ মাধ্যমিক পৰীক্ষাকলৈ কোকৰাঝাৰত জিলা একাডেমিক পৰিষদ , জিলাখনৰ পৰীক্ষা কেন্দ্ৰৰ ভাৰপ্ৰাপ্ত বিষয়া আৰু পৰীক্ষা অনুষ্ঠিত হ'বলগীয়া বিদ্যালয় সমূহৰ মুৰব্বী তথা প্ৰধান শিক্ষকৰৰ এক গুৰুত্বপূৰ্ণ সভা অনুষ্ঠিত হয় ৷
কোকৰাঝাৰ ছেবাৰ আঞ্চলিক কাৰ্যলয়ৰ উদ্যোগত কোকৰাঝাৰ বিজ্ঞান মহাবিদ্যালয়ৰ প্ৰেক্ষাগৃহত অনুষ্ঠিত হয় এই সভা ৷ ক'ভিড প্ৰ'টকল মানি কেনেদৰে হাইস্কুল শিক্ষান্ত, হাইমাদ্ৰাছা আৰু উচ্চতৰ মাধ্যমিকৰ পৰীক্ষাসমুহ অনুষ্ঠিত কৰা হ'ব তাকে লৈ সভাত আলোচনা কৰা হয় ৷ উল্লেখ্য যে, ইতিমধ্যে চিবিএছচিয়ে মেট্ৰিক আৰু উচ্চতৰ মাধ্যমিক পৰীক্ষা সাময়িকভাৱে বাতিল কৰিছে যদিও ছেবাই অহা 12 মে’ৰ পৰা অনুষ্ঠিত হ'বলগীয়া হাইস্কুল শিক্ষান্ত পৰীক্ষা অনুষ্ঠিত কৰাৰ বাবে প্ৰস্তুতি অব্যাহত ৰাখিছে । জানিব পৰা মতে, ইতিমধ্যে পৰীক্ষাৰ বাবে প্ৰায় সাত লাখ বহী কোকৰাঝাৰত আহি পাইছে আৰু এক নতুন ছিট প্লেন তৈয়াৰ কৰা হৈছে ।
ইফালে, সভাৰ অন্তত কোকৰাঝাৰ জিলাৰ ভাৰপ্ৰাপ্ত বিদ্যালয় পৰিদৰ্শক জয়পাল সিং ব্ৰহ্মই সংবাদমাধ্যমৰ আগত কভিড প্ৰ'টকল সম্পূৰ্ণৰূপে মানি লৈ পৰীক্ষা অনুষ্ঠিত কৰা হ'ব বুুুলি মন্তব্য প্ৰকাশ কৰে ৷ কিন্তু এইক্ষেত্ৰত চৰকাৰে যদি তাৎক্ষণিকভাৱে কোনো সিদ্ধান্ত গ্ৰহণ কৰে তেন্তে সেই সিদ্ধান্তই হে চূড়ান্ত সিদ্ধান্ত হ'ব বুলি স্পষ্ট কৰি দিয়ে । কোকৰাঝাৰ জিলাত 27 টা পৰীক্ষা কেন্দ্ৰ আছে আৰু এইবাৰ অতিৰিক্তভাৱে 8 টা কেন্দ্ৰ সাজু কৰি তোলা হৈছে বুলিও সদৰি কৰিছে ভাৰপ্ৰাপ্ত বিদ্যালয় পৰিদৰ্শক জয়পাল সিং ব্ৰহ্মই । উল্লেখ্য যে, সভাত ছেবাৰ পৰামৰ্শদাতা গৌতম দেৱ শৰ্মা, কোকৰাঝাৰ একাডেমিক কাউনন্সিলৰ ভাৰপ্ৰাপ্ত সভাপতি দীপ্তি প্ৰসাদ ব্ৰহ্ম উপস্থিত থাকে ৷
লগতে পঢ়ক: ক'ভিড-19 : প্ৰশাসন আৰু আৰক্ষীৰ দুই শীৰ্ষ বিষয়াৰ সংবাদমেল
