কোকৰাঝাৰ, 25মেঃ ফেচবুকত ভুৱা প্ৰফাইলত বিপিএফ উপ-সভানেত্ৰী তথা সমাজ কল্যাণ মন্ত্ৰী প্ৰমিলাৰানী ব্ৰহ্মৰ বিৰুদ্ধে দুষ্ট চক্ৰই অপপ্ৰচাৰ চলোৱাক লৈ সৰৱ হৈ পৰে মন্ত্ৰীগৰাকী ৷ ইতিমধ্যে দুষ্ট চক্ৰৰ বিৰুদ্ধে কোকৰাঝাৰ সদৰ থানাত এজাহাৰ দাখিল কৰে মন্ত্ৰীগৰাকীয়ে ৷
বিটিএডিত ৰাজ্যপালৰ শাসনৰ সময়তেই বড়োভূমিত বিপিএফ আৰু ইউপিপিএল দলৰ মাজত বিৰাজ কৰিছে এক অঘোষিত শীতল প্ৰতিযোগিতা ৷ ইতিমধ্যে ফেচবুক পেজত কোনো অচিনাক্ত লোকে মন্ত্ৰী প্ৰমিলা ৰাণীক দলৰ মজিয়াত ভাৱমূৰ্তি হেয় প্ৰতিপন্ন কৰিবলৈ ৰচিছে কূটকৌশল ৷ আনকি দুষ্ট চক্ৰটোৱে ফেচবুকৰ ভুৱা প্ৰফাইলত বিপিএফ উপ সভানেত্ৰী তথামন্ত্ৰী প্ৰমিলা ৰাণী ইউপিপিএলৰ সমৰ্থক বুলি ৰাইজক ট্ৰেক্টৰৰ প্ৰতীক চিহ্নত ভোট দিবলৈ বড়ো ভাষাৰে দিয়া আহ্বানে তোলপাৰ লগাইছে বিপিএফ দলত ৷
এই ঘটনাত ক্ষুব্ধ হৈ মন্ত্ৰী প্ৰমিলা ৰাণীয়ে সংবাদমেল সম্বোধন কৰে ৷ সংবাদ মেলত তেওঁ উক্ত বিষয়টো আৰক্ষীয়ে তদন্ত কৰিলে ওলাই পৰিব বুলি কোৱাৰ লগতে এয়া এক সাংঘাতিক অপৰাধ বুলি ক্ষোভ প্ৰকাশ কৰে ৷ লগতে বিপিএফ দলৰ তেওঁ এগৰাকী সক্ৰিয় কৰ্মী, গতিকে দলৰ মাজত বিভ্ৰান্তিৰ সৃষ্টি কৰাৰ উদ্দেশ্যে দুষ্ট চক্ৰটোৱে গভীৰ ষড়যন্ত্ৰ কৰা বুলি সদৰি কৰে ৷ আনহাতে, বিপিএফৰ মহিলা কোষৰ সভানেত্ৰী আৰু সম্পাদিকা ক্ৰমে জয়মতী বসুমতাৰী আৰু ৰমা দেৱী ছেত্ৰীয়ে কোকৰাঝাৰ সদৰ থানাত ভাৰতীয় দণ্ডবিধি আইনৰ ৬৬/৬৭ আই টি এক্ট ২০০০ মৰ্মে ৫০০/৫০১ ধাৰাত এখন এজাহাৰ দাখিল কৰিছে ৷ অতিশীঘ্ৰে আৰক্ষী প্ৰশাসনক দুষ্ট চক্ৰটোক চিনাক্ত কৰি উপযুক্ত শাস্তি বিহিবলৈ আহ্বান জনাইছে মন্ত্ৰী গৰাকীয়ে ৷
আনহাতে, কোভিড -১৯ সন্দৰ্ভত সকলো ৰাইজকে সজাগ আৰু সামাজিক ব্যৱধান ৰাখি চলিবলৈ পৰামৰ্শ দিয়ে মন্ত্ৰী গৰাকীয়ে ৷ ইয়াৰোপৰি অসম বংগ সীমান্তৱৰ্তী শ্ৰীৰামপুৰেদি আহি থকা প্ৰবাসী অসম বাসীক স্বাস্থ্য পৰীক্ষা কৰোৱাই কোৱাৰেন্টাইন হ'বলৈ কয় ৷ মাৰাত্মক কৰ'ণা ভাইৰাছক লৈ নিয়োজিত সকলো স্বাস্থ্যকৰ্মী, বিষয়াসকলক ভালদৰে কাম কৰাৰো আহ্বান দিয়ে মন্ত্ৰীগৰাকীয়ে ৷
লগতে পঢ়ক- সনাতন দাসৰ হত্যাকাণ্ডৰ লগত জড়িত দুই অভিযুক্তক আটক
