কোকৰাঝাৰ,15 অক্টোবৰ: কাঠফুলা উৎপাদনেৰে স্বাৱলম্বী হৈ উঠিছে কোকৰাঝাৰৰ গোঁসাইগাঁৱৰ বলিত বৰুৱা নামৰ এজন যুৱক ৷ যুৱকজনে আত্ম নিৰ্ভৰশীল হোৱাৰ চেষ্টা অব্যাহত ৰখাৰ উপৰিও সংস্থাপনৰ বাট মুকলি কৰিছে আন দহজনৰ ৷ বিগত 3/4 বছৰ পূৰ্বে যুৱকজনে স্থাপন কৰিছিল পাৰিজাত অৰ্গেনিক অৱেষ্টাৰ মাছৰুম ইউনিট নামেৰে এখন কাঠফুলা উৎপাদন ফাৰ্ম ৷ তাৰপিছত আৰু ঘূৰি চাবলগীয়া হোৱা নাই যুৱকজনে ৷ সম্প্ৰতি বছৰেকত কাঠফুলা বিক্ৰীৰে প্ৰায় 5 লক্ষাধিক টকা উপাৰ্জন কৰি স্ব-নিৰ্ভৰশীল হৈ পৰিছে যুৱকজন ৷ গোঁসাইগাঁও মহকুমাৰ তেলিপাৰাস্থিত কৃষি বিজ্ঞান কেন্দ্ৰৰ সহযোগত জৈৱিক পদ্ধতিৰে কাঠফুলা উৎপাদনৰ প্ৰশিক্ষণ গ্ৰহণ কৰা বৰুৱাই বহু নিবনুৱা যুৱক-যুৱতীক কৰ্ম সংস্থাপনৰ পথ মুকলি কৰি দিবলৈ সক্ষম হৈছে ৷ ইয়াৰোপৰি কাঠফুলা উৎপাদনত ব্যৱহৃত খেৰৰ টোপোলাবোৰৰ সহায়ত কেঁচু সাৰ উৎপাদন কৰি লাভাম্বিত হোৱা বুলিও বলিত বৰুৱাই প্ৰকাশ কৰে ৷
উল্লেখ্য যে, লক ডাউনৰ সময়চোৱাত বহু যুৱক-যুৱতীয়ে হেৰুৱাইছিল কৰ্ম সংস্থাপনৰ পথ ৷ সংস্থাপনৰ অভাৱত দিশহাৰা হৈ পৰাৰ বিপৰীতে একাংশই বৈজ্ঞানিক পদ্ধতিৰে কাঠফুলা উৎপাদনৰ প্ৰতি যথেষ্ঠ আগ্ৰহী হোৱা পৰিলক্ষিত হৈছে ৷ তদুপৰি কাঠফুলা উৎপাদনৰ প্ৰতি আগ্ৰহী যুৱক-যুৱতীসকলৰ বাবে কৃষি বিজ্ঞান কেন্দ্ৰৰ লগতে চৰকাৰী বিভাগৰো অধীনত বহু আঁচনি থকাৰ কথা ব্যক্ত কৰে কৃষি বিজ্ঞান কেন্দ্ৰটোৰ বৈজ্ঞানিক গৌতম ভাগৱতীয়ে ৷
লগতে চাওকঃ প্ৰাপ্য আদায়ৰ দাবীত জীৱিকা সখীৰ ধৰ্ণা
