কোকৰাঝাৰ, 23 মাৰ্চ : ক’ৰণা ভাইৰাছৰ সংক্ৰমণৰ পৰা দেশক ৰক্ষা কৰিবৰ বাবে বিভিন্ন ৰাজ্যই ল'কডাউনৰ সিদ্ধান্ত গ্ৰহণ কৰাৰ সময়তে অসম চৰকাৰেও মঙলবাৰৰ পৰা এই সিদ্ধান্ত গ্ৰহণ কৰিছে ৷ এইলৈ তৎপৰ হৈ পৰিছে কোকৰাঝাৰ প্ৰশাসনো ৷
ইতিমধ্যে ৰাজ্যৰ বহুকেইখন জিলাত ব্যাপক তৎপৰতা পৰিলক্ষিত হোৱাৰ লগতে কোকৰাঝাৰ জিলা প্ৰশাসনে কেতবোৰ নীতি-নিৰ্দেশনা জাৰি কৰিছে ৷ জিলাখনৰ প্ৰৱেশ দুৱাৰ ক্ৰমে ৰেল ষ্টেছন, অসম-বংগ সীমান্ত শ্ৰীৰামপুৰত চিকিৎসকৰ দলে দিনে-ৰাতিয়ে স্কেনিঙৰ জৰিয়তে স্বাস্থ্য পৰীক্ষা কৰি আহিছে ৷ ইতিমধ্যেই বাহিৰৰ পৰা আহি উপস্থিত হোৱা লোকসকলক স্বাস্থ্য পৰীক্ষা চলাই থকা হৈছে ৷
এই সংকটৰ সময়ত কোনো লোককে ভূৱা বাতৰিত ভুল নাযাবলৈ অনুৰোধ জনাইছে উপায়ুক্ত পাৰ্থ প্ৰতিম মজুমদাৰে ৷ আনফালে, ঠায়ে ঠায়ে কটকটীয়া নিৰাপত্তা বেষ্টনী গঢ়ি তোলা হৈছে বুলি জানিবলৈ দিয়ে আৰক্ষী বিভাগে ৷
আৰু পঢ়ক : 24 মাৰ্চৰ পৰা 31 মাৰ্চলৈ লক ডাউন ঘোষণা অসম চৰকাৰৰ
