কোকৰাঝাৰ, ১৭ নৱেম্বৰ : বুধবাৰৰ পৰা দুদিনীয়া কাৰ্যসূচীৰে আৰম্ভ হৈছে বিটিচি পৰিষদীয় অধিৱেশন (BTR Council Session) । কোকৰাঝাৰ চহৰৰ বডোফা নগৰস্থিত বিটিচি বিধান পৰিষদীয় ভৱনত (Council House) অনুষ্ঠিত অধিৱেশনত কেইবাখনো বিধেয়ক গৃহীত হোৱাৰ সম্ভাৱনা আছে । অৱশ্যে আৰম্ভণিতে বিৰোধী বিপিএফৰ একাংশ পাৰিষদে বিটিআৰ চৰকাৰৰ নীতি-নিয়মক লৈ তুমুল তৰ্ক-বিতৰ্কত লিপ্ত হয় ।
প্ৰমোদ বড়ো (Pramod Bodo) নেতৃত্বাধীন ইউপিপিএল (UPPL),বিজেপি (BJP) আৰু জি এচ পি (GSP) মিত্ৰজোঁট পৰিষদখনৰ অধিৱেশনত বিপিএফ দলে এতিয়াহে বিৰোধীৰ প্ৰকৃত ভূমিকা লোৱা দেখা গৈছে ৷ ইফালে বিটিচি বিধান পৰিষদৰ কতৃপক্ষই প্ৰথম দিনাই অধিৱেশনত সংবাদ মাধ্যমক ম'বাইল ফোন লৈ বিধান পৰিষদীয় ভৱনৰ ভিতৰত প্ৰৱেশত বাধা প্ৰদান কৰে ।
অধিৱেশন চলি থকা অৱস্থাত পৰিষদীয় ভৱনৰ প্ৰেছ গেলাৰীত ম'বাইল লৈ প্ৰৱেশত অধ্যক্ষই নিষেধাজ্ঞা জাৰি কৰাত কোকৰাঝাৰ প্ৰেছ ক্লাবৰ সংবাদকৰ্মী সকলৰ মাজত তীব্ৰ প্ৰতিক্ৰিয়াৰ সৃষ্টি হয় ৷ বিটিচি বিধান পৰিষদীয় ভৱনৰ সংশ্লিষ্ট কৰ্তৃপক্ষই সাংবাদিকসকলক ফটো ,ভিডিঅ' ফুটেজ সংগ্ৰহত বাধা দিবলৈকে ম'বাইল ফোন ভিতৰলৈ নিয়াত বাধা প্ৰদান কৰাত সংবাদকৰ্মীসকলে বিটিচি বিধান পৰিষদ ভৱনৰ সন্মুখত প্ৰতিবাদ সাব্যস্ত কৰে ৷
কোকৰাঝাৰৰ জ্যেষ্ঠ সাংবাদিক প্ৰীতম ব্ৰহ্ম চৌধুৰীয়ে বিটিচি বিধান পৰিষদীয় ভৱনৰ সংশ্লিষ্ট কৰ্তৃপক্ষই লোৱা এনে সিদ্ধান্তত তীব্ৰ প্ৰতিক্ৰিয়া আৰু ক্ষোভ ব্যক্ত কৰে ৷ জ্যেষ্ঠ সাংবাদিক গৰাকীয়ে এই সিদ্ধান্ত প্ৰত্যাহাৰ কৰাৰ বাবে বিটিচি বিধান পৰিষদৰ অধ্যক্ষকক আহ্বান জনায় ৷ আনহাতে, ডিজিটেল ইণ্ডিয়াৰ দিনত এয়া এক দুৰ্ভাগ্যজনক কাণ্ড বুলি অভিহিত কৰিছে সাংবাদিক কনক চন্দ্ৰ বড়োই ৷ অৱশ্যে সাংবাদিকৰ তীব্ৰ প্ৰতিবাদৰ অন্তত বিটিচি বিধান পৰিষদ কৰ্তৃপক্ষই বিটিচি বিধান পৰিষদৰ প্ৰেছ গেলাৰীত সাংবাদিকসকলক ম'বাইল ফোন লৈ প্ৰৱেশৰ অনুমতি প্ৰদান কৰিবলৈ বাধ্য হয় ।
লগতে পঢ়ক :Rashleela: টীয়কত ক’ভিড প্ৰট’কলৰ মাজেৰে ৰাসৰ পূৰ্ণ প্ৰস্তুতি
