কোকৰাঝাৰৰ,১৮ আগষ্ট: এক নতুন ইতিহাসৰ সৃষ্টি কৰি কোকৰাঝাৰত পোন প্ৰথমবাৰৰ বাবে ৫ আগষ্টৰ পৰা অনুষ্ঠিত হৈছে ঐতিহাসিক ১৩২ সংখ্যক ডুৰাণ্ড কাপ ৷ বতৰৰ বিধিপথালিৰ মাজতে সগৌৰৱে চলি আছে ডুৰাণ্ড কাপ । ইয়াৰ মাজতে কোকৰাঝাৰৰ ছাই ষ্টেডিয়ামত বড়োলেণ্ড এফচি আৰু ইণ্ডিয়ান আৰ্মী এফচিৰ মাজত বৃহস্পতিবাৰে সন্ধিয়া অনুষ্ঠিত হোৱা ডুৰাণ্ড কাপৰ খেলত দৰ্শকৰ উদ্ভণ্ডালিয়ে তীব্ৰ প্ৰতিক্ৰিয়াৰ সৃষ্টি কৰিছে ।
ৰেফাৰীয়ে পক্ষপাতিত্ব কৰাৰ অভিযোগ উত্থাপন কৰি উত্তেজিত দৰ্শকে খেলপথাৰলৈ লক্ষ্য কৰি পানী বটল, চকী আদি দলিয়াই এক অনাহুত পৰিৱেশৰ সৃষ্টি কৰে । জানিবপৰামতে, বৃহস্পতিবাৰে সন্ধিয়া বড়োলেণ্ড এফচি আৰু ইণ্ডিয়ান আৰ্মী এফচিৰ মাজত অনুষ্ঠিত হোৱা খেলখনক লৈ ফুটবলপ্ৰেমী দৰ্শকৰ মাজত পাৰ ভঙা উছাহ দেখা গৈছিল ।
বড়োলেণ্ড এফচি দলৰ খেল চাবলৈ বিভিন্ন প্ৰান্তৰ পৰা দৰ্শকে ষ্টেডিয়াম ঠাহ খাই পৰিছিল । কিন্তু বড়োলেণ্ড এফচিৰ খেল আশানুৰূপ নোহোৱাত একাংশ দৰ্শক নিৰাশ হৈ পৰে । তেনেসময়তে জ্বলা জুইত ঘিউ ঢলাৰ দৰে বড়োলেণ্ড এফচিয়ে এটা গ'ল খোৱাত একাংশ দৰ্শক খঙত টিঙিৰিতুলা হৈ পৰে আৰু পৰৱৰ্তী সময়ত সেয়া সামূহিক হৈ পৰে । উত্তেজিত দৰ্শকে খেলপথাৰলৈ পানী বটল, চকী দলিয়াই এক বিশৃংখলময় আৰু ভয়াৱহ পৰিস্থিতিৰ সৃষ্টি কৰে ।
