কোকৰাঝাৰ, 03 ছেপ্টেম্বৰ: বিটিচিৰ মুখ্য চহৰ কোকৰাঝাৰত বৃদ্ধি পোৱা জুৱাৰ লগতে মুকলিকৈ বিক্ৰী কৰা অবৈধ সুৰাৰ বেহা আৰু অনৈতিক কাৰ্যকলাপৰ বিৰুদ্ধে সৰৱ হ'ল বড়োলেণ্ড ছাত্ৰ সন্থা ৷ সোমবাৰে বড়োলেণ্ড ছাত্ৰ সন্থাৰ এটা সজাতি দলে এনে কাৰ্যকলাপ বন্ধ কৰাৰ দাবীত জিলা উপায়ুক্ত পাৰ্থ প্রতিম মজুমদাৰক সাক্ষাৎ কৰি দাখিল কৰে স্মাৰক পত্ৰ ৷ লগতে সমাজ বিৰোধী কাৰ্যকলাপ তথা মদ, ভাং, ড্ৰাগছ সেৱনৰ ওপৰতো কঠোৰ পদক্ষেপ লবলৈ দাবী তোলে ছাত্ৰ সংগঠনটোৱে । তদুপৰি চহৰ খনৰ স্কুল, কলেজৰ ছাত্ৰ-ছাত্ৰী অহা যোৱা কৰা সময় আৰু কাৰ্যালয়ৰ সময়চোৱাত চহৰখনৰ মাজেৰে গধুৰ যানবাহনৰ চলাচল বন্ধ কৰিবলৈ অনুৰোধ জনাই জিলা উপায়ুক্তক ৷ উক্ত সমস্যা সমাধান কৰাৰ লক্ষ্যৰে অতি শীঘ্ৰে কোকৰাঝাৰ চহৰ পৌৰ-সভা, জিলা আৰক্ষীৰ লগতে প্ৰশাসন আৰু বিভিন্ন দল সংগঠনৰ সৈতে আলোচনাত মিলিত হৈ কঠোৰ পদক্ষেপ লোৱাৰ আশ্বাস প্ৰদান কৰে জিলা উপায়ুক্ত পাৰ্থ প্রতিম মজুমদাৰে ৷
উল্লেখ্য যে, বিভিন্ন সময়ত মুকলিকৈ জুৱা, সুৰা বিক্ৰী কৰাৰ বাহিৰেও একাংশ সমাজ বিৰোধী লোকে কোকৰাঝাৰ আৰক্ষীৰ সহযোগত প্ৰায় প্ৰতিটো মাহে মেলাৰ নামত জুৱা আৰু অবৈধ সুৰাৰ বেহা চহৰ খনৰ বিভিন্ন ঠাইত অনুষ্ঠিত কৰি অহাৰ অভিযোগ ছাত্ৰ সংগঠনটোৰ ৷ লগতে এই ক্ষেত্ৰত আৰক্ষী জিলা প্ৰশাসন নিমাত থকাৰো অভিযোগ তোলে সংগঠনটোৱে ৷
