কোকৰাঝাৰ, 6 ডিচেম্বৰঃ ঐতিহাসিক বড়ো পটভূমিৰ আধাৰত স্থাপন হোৱা কেন্দ্ৰীয় প্ৰযুক্তিবিদ্যা প্ৰতিষ্ঠান চমুকৈ চি আই টিৰ 14 তম প্ৰতিষ্ঠা দিৱস শুক্ৰবাৰে কোকৰাঝাৰত পালন কৰা হয় ৷ এই কাৰ্যসূচীত অংশগ্ৰহণ কৰে মুখ্যমন্ত্ৰী সৰ্বানন্দ সোণোৱালে ৷ অনুষ্ঠানত অংশ লোৱাৰ উপৰি সোণোৱালে চি আই টি ৰ চতুর্থ প্ৰশাসনিক ভৱনৰ আধাৰশিলা স্থাপন কৰে । কোকৰাঝাৰৰ বালাগাওঁষ্টিত চি আই টিৰ মুকলি সভাত অংশ গ্ৰহণ কৰা মুখ্যমন্ত্ৰী গৰাকীয়ে এসময়ৰ সন্ত্ৰাসজৰ্জৰ অঞ্চলতোলৈ শান্তি ঘূৰি অহা বুলি উল্লেখ কৰে ৷ তদুপৰি বি টি চি প্ৰধান হাগ্ৰামা মহিলাৰীৰ সবল নেতৃত্বৰ ভূয়সী প্ৰশংসা কৰে । বৰ্তমানৰ কোকৰাঝাৰ শৈক্ষিক হাবলৈ সলনি হোৱাৰ কথা উল্লেখ কৰি, অসমক বিশ্বৰ বুকুত প্ৰতিষ্ঠা কৰিবলৈ হ'লে শিক্ষা অপৰিহাৰ্য বুলি মন্তব্য কৰে মুখ্যমন্ত্ৰী সোণোৱালে ।
অনুষ্ঠানত উপস্থিত থকা বি টি চি প্ৰধান হাগ্ৰামা মহিলাৰীয়ে গুৱাহাটীৰ আই আই টি আৰু এ আই আই এম এছৰ কেম্পাছ কোকৰাঝাৰত স্থাপন কৰা হ’ব বুলি ঘোষণা কৰে । উক্ত অনুষ্ঠানত বি টি চি ৰ উপ-মুখ্য কাৰ্যবাহী খাম্পা বৰগয়াৰী, মন্ত্ৰী চন্দন ব্ৰহ্ম, কাৰ্যবাহী সদস্য ক্ৰমে ৰাজীৱ কুমাৰ ব্ৰহ্ম, দনেশ্বৰ গয়াৰী, চি আই টি ৰ অধ্যক্ষ, সঞ্চালককে ধৰি বহু বিশিষ্ট লোকে অংশগ্ৰহণ কৰে ।
লগতে চাওকঃআজিৰে পৰা ছবিগৃহত অসমীয়া ছবি প্ৰতিঘাত
