কৰিমগঞ্জ,৮ মে': অৱশেষত আৰক্ষীৰ হাতত গ্ৰেপ্তাৰ দুই চিলনী চোৰ ৷ এগৰাকী মহিলাৰ ডিঙিৰ পৰা সোণৰ চেইন কাঢ়ি পলায়ন কৰা দুই চিলনী চোৰক কৰায়ত্ত কৰে কৰিমগঞ্জ আৰক্ষীয়ে ৷ চহৰখনৰ বনমালী ৰোডৰ পৰা শিৱম দাস আৰু লক্ষীবজাৰৰ পৰা বিকি হৰিজন নামৰ দুই চিলনী চোৰক গ্ৰেপ্তাৰ কৰিবলৈ সক্ষম হয় কৰিমগঞ্জ আৰক্ষী ৷
উল্লেখযোগ্য যে, বিগত ২৪ এপ্ৰিলত কৰিমগঞ্জৰ বনমালী ৰোডৰ জ্যোতিকা বর্ধন নামৰ এগৰাকী মহিলাৰ ডিঙিৰ পৰা শিৱম দাস আৰু বিকি হৰিজনে সোণৰ চেইন কাঢ়ি নি পলায়ন কৰিছিল । মঙলবাৰে পুৱা মহিলাগৰাকীয়ে প্ৰাতঃভ্ৰমণ কৰাৰ সময়তে সংঘটিত হৈছিল এই ঘটনা । চহৰখনৰ মাজমজিয়াত থকা আৰক্ষী অধীক্ষকৰ বাসভৱনৰ সন্মুখতে এই ঘটনা সংঘটিত হৈছিল ।
এই ঘটনা সংঘটিত হোৱাৰ পাচতে কৰিমগঞ্জ আৰক্ষীয়ে ভাৰতীয় দণ্ডবিধি আইনৰ ধাৰা ৪০৯/২০২১, ইউ/এছ-৩৯২ নম্বৰত ৰুজু কৰিছিল গোচৰ । সম্প্ৰতি কৰিমগঞ্জ আৰক্ষীয়ে সোধ-পোছ অব্যাহত ৰাখিছে ধৃত দুই চিলনী চোৰক ।
লগতে পঢ়ক: তেজপুৰত লক ডাউন ঘোষণাৰ সম্ভাৱনা
