কৰিমগঞ্জৰ ক'ভিড চিকিৎসালয়ত উপস্থিত মন্ত্ৰী পীয়ুষ হাজৰিকা

কৰিমগঞ্জ ক'ভিড চিকিৎসালয়খনত উপস্থিত হৈ ৰাজ্যিক স্বাস্থ্য মন্ত্ৰী পীয়ুষ হাজৰিকাই চিকিৎসালয়ৰ ৰোগী সকলৰ সৈতে মত বিনিময় কৰাৰ লগতে শেহতীয়া পৰিস্থিতি সন্দৰ্ভত কৰ্তৃপক্ষৰ সৈতে গুৰুত্বপূৰ্ণ বৈঠকত মিলিত হয় মন্ত্ৰীগৰাকী ৷

কৰিমগঞ্জ, 21 জুলাইঃ ৰাজ্যত প্ৰতিদিনে বৃদ্ধি পাই আহিছে ক'ভিড-19 ত আক্ৰান্ত লোকৰ ৷ ৰাজ্যৰ আন জিলাৰ লগতে কৰিমগঞ্জ জিলাতো কৰ'ণা মহামাৰীয়ে সন্ত্ৰাস সৃষ্টি কৰিছে ৷

মঙলবাৰে কৰিমগঞ্জ জিলাৰ ক'ভিড চিকিৎসালয় পৰিদৰ্শন কৰে ৰাজ্যিক স্বাস্থ্যমন্ত্ৰী পীয়ুষ হাজৰিকাই ৷ চিকিৎসালয়খনত উপস্থিত হৈ মন্ত্ৰী গৰাকীয়ে চিকিৎসালয়ৰ ৰোগী সকলৰ সৈতে মত বিনিময় কৰাৰ লগতে কৰিমগঞ্জ জিলা উপায়ুক্তৰ কাৰ্যালয়ৰ সভাগৃহত জিলাৰ এক পৰ্যালোচনা সভাত মিলিত হয় । জিলা খনত কৰ'ণা ভাইৰাছত আক্ৰান্ত হোৱা লোকৰ চিকিৎসাকে আদি কৰি সকলো পৰিস্থিতিৰ বুজ লয় মন্ত্ৰী জনে ৷

পিছত সাংবাদিকৰ সৈতে হোৱা বাৰ্তালাপত মন্ত্ৰীজনে উল্লেখ কৰে যে, হোম আইশ্ব'লেচনত যোৱাসকলে নিজ ঘৰতেই সকলো সা-সুবিধা থকাৰ কথা উল্লেখ কৰি নিজে লিখি দিব লাগিব ৷ আৰু এম্বুলেঞ্চকে ধৰি সকলো সু-সুবিধা থাকিলেহে সেইটো কাৰ্যকৰি হয় ৷ ইফালে হোম আইচলেচনত থকা এগৰাকি ব্যক্তিৰ মঙলবাৰে মৃত্যু ঘটাক লৈ তেওঁ দুখ প্ৰকাশ কৰে । আনহাতে, কৰিমগঞ্জ ক'ভিড-১৯ চিকিৎসা কেন্দ্ৰত এতিয়ালৈকে ভেন্টিলেচনৰ সেৱা আৰম্ভ নোহোৱাৰ কথাও সদৰি কৰে মন্ত্ৰীজনে । লগতে উক্ত চিকিৎসালয় খনত কিছু কাৰিকৰী বিজুতি আছে যদিও কম সময়ৰ ভিতৰতে সকলো ঠিক কৰা হ'ব বুলি সাংবাদিকৰ আগত মন্ত্ৰীজনে মন্তব্য কৰে ৷

লগতে পঢ়ক- আনলকৰ দিশে আগবাঢ়িছে যোৰহাট জিলা