কৰিমগঞ্জ, 15 মাৰ্চ : নিৰ্বাচন চমু চপাৰ লগে-লগে ভোটৰ ৰাজনীতিত ব্যস্ত ৰাজ্য প্ৰশাসন৷ যাৰ বাবে শিক্ষা বিভাগেও মূৰ তুলি চোৱা নাই বিদ্যালয়-মহাবিদ্যালয়লৈ৷ প্ৰশাসনৰ হেমাহিত তুলুঙা নাৱত এতিয়া গতি কৰিছে মন্ত্ৰী সিদ্ধাৰ্থ ভট্টাচাৰ্যৰ শিক্ষা বিভাগ৷
কৰিমগঞ্জ জিলাৰ একাংশ বিদ্যালয়ে শিক্ষা বিভাগৰ অবহেলাত ধাৱিত হৈছে নিম্ন পৰ্যায়লৈ৷ পাথাৰকান্দি প্ৰাথমিক শিক্ষা খণ্ডৰ অধীনৰ ছোট হাতাইছৰা প্ৰাথমিক বিদ্যালয়ত নাথাকে এজনো শিক্ষক৷ বিদ্যালয়খনত নাই মধ্যাহ্ণ ভোজনৰো ব্যৱস্থা৷ ঠিক তেনেদৰে 18 নং লাইন দক্ষিণ হাতিখিৰা প্ৰাথমিক বিদ্যালয়তো শিক্ষকলৈ অপেক্ষা কৰি বহি থাকিবলগীয়াত পৰে ছাত্ৰ-ছাত্ৰীয়ে৷ কিন্তু বিদ্যালয়লৈ খুব কমেইহে আহে ছাৰ-বাইদেউ৷ বিদ্যালয়খনৰ অভিভাৱকৰ অভিযোগ অনুসৰি পাঠদানৰ পৰিৱৰ্তে নিজৰ টিভি দোকানতহে থাকে শিক্ষক ৰৱীন্দ্ৰ ত্ৰিপুৰা৷ এই দুয়োখন বিদ্যালয়ৰ লগতে 20 নং লাইন প্ৰাথমিক বিদ্যালয়ৰো অৱস্থা একেই শোচনীয়৷ বিদ্যালয়খনৰ প্ৰধান শিক্ষক এন আৰ চি দায়িত্বত থকাৰ লগতে বাকী তিনিজন শিক্ষকৰ সময় নাই বিদ্যালয়লৈ অহাৰ৷ গতিকে শিক্ষক অবিহনেই দিনৰ দিনটো বিদ্যালয়ত বোন্দাপৰ দিয়ে ছাত্ৰ-ছাত্ৰীয়ে৷ শিক্ষা ব্যৱস্থাৰ উন্নয়নৰ ঢাক-ঢোল পিটা বিজেপিৰ শাসনত এনেদৰেই এতিয়া চলিছে মেৰুদণ্ডহীন শিক্ষা ব্যৱস্থা৷
