কৰিমগঞ্জ,19 মে': বাৰিষাৰ দিন আহিলেই চিন্তাত টোপনি নাহে কৰিমগঞ্জৰ পাথাৰকান্দি সমষ্টিৰ হাতিখিৰা অঞ্চলৰ ৰাইজৰ ৷ বিগত 25 টা বছৰে লংগাই নদীৰ খহনীয়াই টোপনি হৰিছে হাতিখিৰাবাসীৰ ৷ অঞ্চলটোৰ ৰাইজে জানিবলৈ দিয়া মতে, খহনীয়াৰ ফলত ইতিমধ্যে বহু লোকৰ ঘৰ-বাৰীৰ লগতে এটা গড়কাপ্তানী পথো নদীৰ বুকুত জাহ গৈছে ৷ খহনীয়াই অঞ্চলটোৰ ৰাইজৰ জীৱন আৰু সম্পত্তিলৈ ভাবুকি কঢ়িয়াই অনা স্বত্বেও চৰকাৰ তথা বিভাগীয় কৰ্তৃপক্ষই কোনো কাণসাৰ নিদিয়া বুলিও স্থানীয় ৰাইজে অভিযোগ উত্থাপন কৰিছে ৷
সকলো সমস্যাৰ বিষয়ে অৱগত কৰি চৰকাৰলৈ বহুবাৰ স্মাৰক পত্ৰ প্ৰেৰণ কৰিও সুফল নোপোৱাৰ অভিযোগ উত্থাপন কৰি অঞ্চলটোৰ ৰাইজে নৱগঠিত চৰকাৰক সমস্যা সমাধানৰ বাবে বিশেষ ব্যৱস্থা গ্ৰহণৰ আহ্বান জনাইছে ৷ ইতিমধ্যে প্ৰায় বহুকেইটা ঘৰ নদীৰ বুকুত জাহ যোৱাৰ বিষয়ে অৱগত স্থানীয় এজন লোকে কয় যে,শীঘ্ৰে খহনীয়া প্ৰতিৰোধৰ ব্যৱস্থা নকৰিলে পুনৰ একাংশ পৰিয়াল নদীৰ বুকুত জাহ যোৱাটো নিশ্চিত ৷
উল্লেখ্য যে, বিগত বৰ্ষত বৰষুণ হৈছিল যদিও খহনীয়াৰ কবলৰ পৰা কথমপি ৰক্ষা পৰিছিল বহু পৰিয়াল ৷ সেয়ে বিভিন্ন স্থানত লংগাই নদীৰ মথাউৰিৰ অৱস্থাই নৈপৰীয়া ৰাইজৰ মাজত আতংক সৃষ্টি কৰিছে বুলি প্ৰকাশ কৰি চৰকাৰক শীঘ্ৰে এইক্ষেত্ৰত ব্যৱস্থা গ্ৰহণৰ বাবে স্থানীয় ৰাইজে দাবী উত্থাপন কৰিছে ৷
