কৰিমগঞ্জ,7 জুন: কৰিমগঞ্জৰ পাথাৰকান্দি সমষ্টিৰ অন্তৰ্গত বুবৰিঘাট চাহ বাগিচাত সংঘটিত হৈছে মৰেল পুলিচিগিৰিৰ ঘটনা ৷ চোৰৰ সন্দেহত এগৰাকী লোকক ব্যাপকভাৱে গণপ্ৰহাৰ কৰে স্থানীয় ৰাইজে ৷ অৱশেষত একাংশ সচেতন ব্যক্তিৰ সহযোগত আৰক্ষীয়ে লোকজনক উদ্ধাৰ কৰি পাথাৰকান্দি চিকিৎসালয়ৈ প্ৰেৰণ কৰে যদিও উন্নত চিকিৎসাৰ বাবে লোকজনক কৰিমগঞ্জ অসামৰিক চিকিৎসালয়ত ভৰ্তি কৰোৱা হয় ৷
ৰাতাবাৰী ধৰগাঁৱৰ ইছান আলী নামৰ লোকজনে শনিবাৰে নিশাৰ ভাগত বুবৰিঘাট চাহ বাগিচাত সন্দেহজনকভাৱে বিচৰণ কৰাত সন্দেহ ওপজে স্থানীয় ৰাইজৰ ৷ দৰাচলতে উক্ত অঞ্চলত সঘনে বাংলাদেশী গৰু চোৰে তাণ্ডৱ চলোৱাৰ বাৱে ৰাইজে ব্যক্তিজনক চোৰৰ সন্দেহ কৰে ৷ ইয়াৰ পিছতে বাগিচাৰ একাংশ যুৱকে লোকজনক ধৰি মাৰধৰ কৰে ৷
সম্প্ৰতি লোকজনৰ স্বাস্থ্যৰ অৱস্থা উন্নত হোৱা বুলি জানিব পৰা গৈছে ৷ ঘটনাৰ বুজ ল’বলৈ চিকিৎসালয়ত উপস্থিত হয় জিলা উপ-আৰক্ষী অধীক্ষক সুধন্য শুক্লবৈদ্য ৷ ইতিমধ্য়ে পাথাৰকান্দি আৰক্ষীয়ে আৰম্ভ কৰিছে ঘটনাৰ তদন্ত ৷ লক ডাউনৰ মাজতো ব্যক্তিগৰাকীয়ে চাহ বাগিচাত কি কাৰণে ঘূৰা-ফুৰা কৰিছিল সেয়া সন্দেহজনক ৷
