কৰিমগঞ্জ, 28 জুনঃ যোৱা 20 জুনত কৰিমগঞ্জৰ জিলা কাৰাগাৰৰ পৰা পলায়ন কৰিছিল তিনিজনকৈ কাৰাবন্দীয়ে ৷ চৰকাৰী নিৰ্দেশ অনুসৰি আটাকেইজন কাৰাবন্দীক 14 দিনৰ বাবে জেলৰ ভিতৰতে আছুতীয়া কক্ষত কোৱাৰেণ্টাইন কৰি ৰখা হৈছিল ৷ কিন্তু দুৰ্ভাগ্যজনকভাৱে তেওঁলোকে সেই কোঠাৰ খিৰিকী ভাঙি কাৰাগাৰৰ ওপৰেৰে পলাই যাবলৈ সক্ষম হয় ৷ পলাতক কাৰাবন্দী কেইজন ক্ৰমে ফয়জুৰ ৰহমান, ওৱাহিদ আলী আৰু মুছকান আলীয়ে কাৰাগাৰৰ দেৱালেৰে বগাই জাপ দি পলায়ন কৰে বুলি উল্লেখ কৰে কাৰাগাৰখনৰ অধীক্ষক গৰাকীয়ে ৷
কাৰাবন্দী কেইজনৰ পলায়নৰ সময়ত কাৰাগাৰৰ কৰ্তব্যত নিয়োজিত আছিল চাৰি গৰাকী কৰ্মচাৰী ৷ সম্প্ৰতি তেওঁলোকৰ বিৰুদ্ধে উত্থাপিত হৈছে কৰ্তব্যত হেমাহিৰ অভিযোগ ৷ যাৰ বাবে জেইলাৰ ৰঞ্জন চৌধুৰী, সহ ৱাৰ্ডাৰ ৰঞ্জন নাথ, আতাবুৰ ৰহমান বৰভূঞা আৰু কালী কুমাৰ দাস নামৰ চাৰিওগৰাকী কৰ্মচাৰীকে নিলম্বন কৰা হৈছে ৷ লগতে চাৰি গৰাকী লোকক আন স্থানলৈ বদলিও কৰা হৈছে ৷
লগতে পঢ়কঃ ধুবুৰীত বানৰ সমান্তৰালকৈ ব্ৰহ্মপুত্ৰৰ গৰাখহনীয়াৰ ভয়ংকৰ ৰূপ
